Պատգամավորն` ընդդեմ բլոգերի

Երեկվանից «Ֆեյսբուքը» թնդում է: Հայ իրականության մեջ առաջին անգամ պատգամավորը դատի է տվել բլոգերի:

ԱԺ պատգամավոր, ԲՀԿ մամլո խոսնակ Տիգրան Ուրիխանյանը դատի է տվել բլոգեր Էդգար Բարսեղյանին` Demotivator.am կայքում իր վերաբերյալ ծաղրանկարի համար:

Երեկ այս գործով տեղի է ունեցել նախնական դատական նիստը: Էդգար Բարսեղյանը, անդրադառնալով նիստին, գրել է. «Ավարտվեց նախնական դատական նիստը, որը նվիրված էր պատգամավոր Տիգրան Ուրիխանյանի՝ իմ, Demotivator.am կայքի սեփականատեր՝ Էդգար Բարսեղյանի, դեմ ուղղված հայցին, որում նա պահանջում է (մեջբերում հայցադիմումից) «հայցվորի պատիվը, արժանատվությունն ու գործարար համբավը պատկերի միջոցով արատավորելու համար, պարտավորեցնել պատասխանողին հրապարակային ներողություն խնդրել Տ.Ու.-ից և որպես փոՂ(!)հատուցում 1.000.000 դրամ բռնագանձել (+500.000 իր կողմից վարձաձ փաստաբանի վճարը, +30.000 տուրք) հօգուտ հայցվորի»:

 

Ի դեպ, մի շարք բլոգերներ ու ֆեյբուքյան ակտիվիստներ ֆլեշմոբ են կազմակերպել` ի պաշտպանություն բլոգերի: Նրանք պնդում են, որ սա խոսքի ազատության դեմ է ուղղված:

 

Իսկ այսօր Էդգար Բարսեղյանն իր բլոգում պարզաբանումներ է տվել` կապված Տիգրան Ուրիխանյանի վերբերյալ դեմոտիվատորի պատրաստման հետ, որում, մասնավորապես, գրված է. «Ես չեմ պնդում, և ինքս էլ, անկեղծ, չեմ կարծում, որ Ուրիխանյանին նվիրված դեմոտիվատորը ահավոր հաջողված է զուտ արվեստի, ճաշակի տեսակետից։ Ավելին, այն նույնքան ցածրարվեստ է, որքան ցածր է չափանիշը՝ քաղաքական գործիչ կոչվելու համար։ Ինչ վերաբերում է դրանում արտահայտած գաղափարին՝ թույլ տվեք մի փոքր ծավալվել ու մանրամասն նկարագրել պրոցեսը, որի արդյունքում ստեղծվեց այդ դեմոտիվատորը։

Սկսեմ նրանից, որ Ուրիխանյանի՝ «Տարվա ամենաոճային քաղաքական գործիչ» ճանաչվելու մասին լուրին տեղեկացել եմ ֆեյսբուքում տեղադրված, kamoblog.am տանող հղումով։ Ինձ թվում է, կարիք չկա պատմելու, թե որն է այդ կայքի ուղղվածությունը, այն է՝ քաղաքականության հետ մինչ այդ ընդհանրապես ոչ մի կապ չունենալը։ Այդ պատճառով իսկ միանգամից զարմացա. ի՞նչ գործ ունի քաղաքական գործչի մասին նյութը շոու-բիզնեսի, «գլամուրի», թիթիզության, աստղային փայլիկներով լուսանկարների կողքին։ Կարդալով նյութը էլ ավելի զարմացա, որ լինելով քաղաքական գործիչ, պարոն Ուրիխանյանը ոչ միայն համաձայնվել է այդ կոչումը իրեն շնորհելու հետ, այլ նաև հպարտորեն կիսվել է այդ լուրով իր ֆեյսբուքյան էջում։ Ես ոչ մի դեպքում չեմ ցանկանում վիճարկել պարոն Ուրիխանյանի ոճայնությունը. կոչումը շնորհողների մասնագիտական հմտությունները այդ հարցում հաստատ ավելի խորն են, քան իմը։ Բայց այն, որ անմիջապես պատկերացրեցի պարոն Ուրիխանյանի պաշտոնական դեֆիլեն ԱԺ նիստերի դահլիճում՝ փաստ է։ Փաստ է նաև, որ ոճայնության իմ ունեցած պատկերացումները միանգամից կապում են այդ բառը իգական սեռի հետ։ Այո, ես կարծում եմ, որ լուրջ տղամարդու համար, որի մասնագիտական գործունեությունը կապված չէ իր մարմնական, ֆիզիկական տեսքի հետ (օրինակ՝ մոդելի, դերասանի) ընդհանրապես սազական չէ ի ցույց աշխարհի դնել սեփական «նվաճումները» այդ ոլորտում։ Չէ, իհարկե հասկանում եմ, երբ ուրիշ ոչինչ չունես արած (խոսքը մասնագիտական գործունեության մասին է)՝ դա է մնում։ Այո՝ ես կարծում եմ, որ ոճայնությամբ հպարտանալը մանեկենուհիների, դերասանուհիների և այլ գեղեցկուհիների մենաշնորհն է»: