Մեկնարկեց "Ես կարող եմ աշխատել" խորագրով օլիմպիադան

Երիտասարդական համահայկական հիմնադրամում այսօր մեկնարկել է «Ես կարող եմ աշխատել» խորագրով օլիմպիադա-մասնագիտական կարողությունների ցուցադրություն ծրագիրը՝ տարբեր մասնագիտական ուսումնական հաստատությունների ուսանողների մասնակցությամբ:

Միջոցառմանը ներկա է եղել նաև վարչապետ Տիգրան Սարգսյանը: Ուսանողները կառավարության ղեկավարին են ներկայացրել իրենց նախնական և միջին մասնագիտական կրթության արդյունքների գործնական աշխատանքները և մասնագիտական կարողությունները:

Ծրագրի նպատակն է նպաստել մասնագիտական կրթության դերի բարձրացմանը և խթանել սոցիալական գործընկերությունը:

Օլիմպիադայի շրջանակներում մրցելու են «խոհարար», «հյուսն, ատաղձագործ», և «դերձակ-մոդելավորող» որակավորումների երեք թիմեր, իսկ մասնագիտական կարողությունների ցուցադրությունն անցկացվելու է «փայտի գեղարվեստական փորագրող», «հասարակական սնունդ», «գորգագործ», «քարի գեղարվեստական փորագրող», «խեցեգործական գեղարվեստական իրեր պատրաստող», «մանրանկարիչ», «գեղանկարչություն», «դարբին դրոշմող» և այլ որակավորում ստացած ուսանողների կողմից: 

ՀՀ կրթության և գիտության նախարարության կազմակերպած միջոցառմանն, ընդհանուր առմամբ, մասնակցում է 90 ուսանող՝ 21 ուսումնական  հաստատություններից: