ԵԱՀԿ ՄԽ համանախագահները ներկայացրել են իրենց տարեկան զեկույցը

ԵԱՀԿ ՄԽ համանախագահներ Ռոբերտ Բրադկեն, Իգոր Պոպովը եւ Բեռնար Ֆասիեն, նաեւ ԵԱՀԿ գործող նախագահի անձնական ներկայացուցիչ Անջեյ Կասպրշիկը ԵԱՀԿ Մշտական խորհրդին են ներկայացրել իրենց գործունեության տարեկան հաշվետվությունը:

Համանախագահները նշել են, որ անցած տարվա ընթացքում իրենք տարածաշրջան են այցելել 8 անգամ, անցկացրել են 14 առանձին հանդիպումներ Հայաստանի եւ Ադրբեջանի նախագահների հետ, 4 անգամ ոտքով հատել են ղարաբաղա-ադրբեջանական ԶՈՒ շփման գիծը` ցուցադրելով, որ այն չի կարող խոչընդոտ լինել երկու երկրների ժողովուրդների համար, եւ որ հրադադարի ռեժիմի պահպանման հարցում ռազմական համակարգումը հնարավոր է, եթե կողմերը կամք դրսեւորեն:

Միջնորդները շեշտել են, որ Ղարաբաղյան հակամարտության կարգավորման ռազմական տարբերակն անհնար է, նաեւ որ անընդունելի ստատուս քվոյի հաղթահարման ու խաղաղության հասնելու համար հարկավոր է կողմերի քաղաքական կամքը, որը հիմք կդառնա բարդ որոշումների կայացման համար:

Համանախագահները նաեւ տեղեկացրել են բանակցային մթնոլորտի բարելավմանը, ժողովուրդների միջեւ փոխըմբռնմանը, հրադադարի ռեժիմի պահպանմանն ուղղված լրացուցիչ միջոցառումների մասին: Նրանք մտադիր են նոյեմբերին դարձյալ այցելել տարածաշրջան` բանակցային գործընթացի շարունակման վերաբերյալ հարցեր քննարկելու: