Հարություն Առաքելյանի ռոմանտիզմը

Ադրբեջանի` ՄԱԿ-ի Անվտանգության խորհրդի ոչ մշտական անդամ դառնալը ՀՌԱԿ ատենապետ Հարություն Առաքելյանը լրագրողների հետ հանդիպման ժամանակ որակեց լավ: Դեռ մի բան էլ ավելի, ըստ նրա, Ադրբեջանն ինքն իր ոտքով թակարդն է ընկել, եւ մենք պետք է շտապենք օգտվել իրավիճակից:

«Երկիր»-ի թղթակցի այն դիտարկմանը, թե Ադրբեջանը դեռ ՄԱԿ-ում չէր, ոչինչ անել չէինք կարողանում, հիմա ի՞նչ պետք է անենք, Առաքելյանը նշեց, թե հարմար առիթ է ՄԱԿ-ի հովանու ներքո գործող Միջազգային դատարանում Ադրբեջանի կառավարության դեմ դատական հայց ձեւակերպելու համար:

Մեր այն դիտարկմանը, թե ԱԳՆ-ն անգամ հայտարարությամբ հանդես չեկավ եղածի կապակցությամբ, ի՞նչ երաշխիքներ կան, որ Ադրբեջանի դեմ դատական հայց կներկայացնի, բանախոսը մեր թղթակցին խորհուրդ տվեց այդքան հոռետես չլինել, վեր կանգնել զգացմունքայնությունից:

«Հարցի լուծման ակնկալիքներ կա՞ն, թե՞ ոչ» հարցին էլ Առաքելյանը պատասխանեց, որ խնդիրն ակնկալիքը չէ, այլ այն, որ խնդիրը բարձրաձայնվի: