Երկխոսությունը կշարունակվի Տիգրան Առաքելյանի ազատ արձակումից հետո

Բանդիտիզմը երկիրն ուտում է, իսկ ոստիկանապետը, բանուգործը թողած, մի ամբողջ ասուլիս է ձոնում ՀԱԿ երիտասարդ ակտիվիստների վարքն ու պահվածքը նկարագրելու համար. այսօր լրագրողների հետ հանդիպման ժամանակ  ասաց ՀԱԿ ներկայացուցիչ Մանուկ Սուքիասյանը:

Ինչ վերաբերում է Տիգրան Առաքելյանին, ըստ նրա` վերջինս պատանդ է պահվում: «Չգիտեմ` փոքր վրեժխնդրությո՞ւն է, թե՞ մեծ: Եթե իշխանությունը վեցին թողել է, մեկին պահել, ապա սակարկելու համար են անում»,- նշեց Մ. Սուքիասյանը` հավելելով, որ Տիգրան Առաքելյանը պետք է օր առաջ ազատ արձակվի, եւ այդ ժամանակ երկխոսությունը կշարունակվի: «Իշխանությունները դրժել են իրենց խոստումը Տիգրան Առաքելյանին ազատ արձակելու վերաբերյալ»,- ընդգծեց նա:

Իսկ քաղաքական տեխնոլոգ Կարեն Քոչարյանի կարծիքով` ընդդիմության երիտասարդները սադրել են միջադեպը, ինչը անհրաժեշտ է Կոնգրեսին` ընտրություններից առաջ իրավիճակ սրելու համար:

«Ես համոզված եմ, որ երկխոսությունը շարունակվելու է: Ավելին ասեմ` համոզված եմ, որ երկխոսությունը մինչ պաշտոնական մեկնարկը ունեցել էր ոչ հրապարակային սկիզբ»,- ասաց նա` հավելելով, որ ակնհայտ է` մինչ ընտրությունները ընդդիմությունը կոշտացնելու է իր դիրքորոշումը. «Յուրաքանչյուր կողմը փորձում է մաքսիմալ դիվիդենդներ հավաքել»: