Երեւանի կոյուղու համակարգը մեծ ներդրումների կարիք ունի

Վերջերս տեղեկություն էր տարածվել այն մասին, որ Երեւանի կոյուղու համակարգն ամենավատն է ողջ հանրապետությունում:

Լրագրողների հետ հանդիպման ժամանակ «Երեւան ջուր» ընկերության «Արեւելք» եւ «Արեւմուտք» շահագործման տնօրենները թեեւ ընդունեցին, որ համակարգում խնդիրները բազմաթիվ են, բայց չհամաձայնեցին, որ Երեւանի կոյուղին հանրապետությունում ամենավատն է:

Ընկերության «Արեւմուտք» շահագործման տնօրեն Արամ Սահակյանի խոսքերով`  «Երեւան Ջուր» ընկերությունը, լինելով շահագործող, կոյուղատարերի վիճակի մասին ուսումնասիրություն չի կատարել, եւ նման տվյալ չի փոխանցել, իբր համակարգի 75 տոկոսը քայքայված է:

Սահակյանը նշեց, որ մայրաքաղաքում  կոյուղու տարեկան 10 հազար  վթար են վերացնում, ուստի համակարգը չի կարող ավելի վատը լինել, քան մարզերում:

Ի տարբերություն անցած տարիների` 2011-ին ներդրումների կեսը կոյուղու համակարգի վրա են ծախսելու: 2011-2012-ին գումարը կկազմի մոտ 300 մլն դրամ: Սահակյանը նշեց, որ հաջորդ տարիներին գումարը էականորեն կավելանա:

«Երեւան Ջուր» ընկերության «Արեւելք» շահագործման տնօրեն Կարապետ Օհանյանն էլ հավելեց, որ առավել վատ վիճակում են փոքր տրամագծի կոյուղագծերը: Խոցելի են հատկապես Շենգավիթ, Շահումյան եւ Էրեբունի վարչական շրջանները:

Օհանյանը նշեց նաեւ, որ Ֆրանսիայի կառավարության հետ վարկի տրամադրման բանակցություններ են ընթանում, որոնց հաջող ավարտի դեպքում հնարավոր կլինի շարունակել կոյուղու համակարգի մաքրման կայանի վերակառուցման աշխատանքները: