Երևանի բնակիչները կոտրում են կոյուղու խողովակներն իրենց այգիները ոռոգելու համար. «Վեոլիա ջուր»

Օրեր առաջ ԱԻՆ-ից և Երևանի Նոր Նորք վարչական շրջանից ահազանգ է ստացվել «Վեոլիա Ջուր» ՓԲԸ, որ Մյասնիկյան պողոտայում՝ Նոր Նորքի առաջին զանգվածի կողմից, ջրի արտահոսք և քարաթափում է նկատվում: Այս մասին տեղեկացնում է «Վեոլիա ջուր» ՓԲԸ hանրային կապերի ծառայությունը: Ընկերության տարածած հաղորդագրության մեջ ասվում է.

Այն, որ մեզանում ոռոգման նպատակով ապօրինաբար օգտագործվում է խմելու ջուր, գաղտնիք չէ: Այստեղից էլ ամառային տապերին երբեմն նկատվող ջրի անբավարարությունը: Բայց փաստ է, որ որոշ բնակավայրերում դրա համար օգտագործվում է նաև կոյուղաջուր, ինչը բոլոր առումներով պարզապես անթույլատրելի է: Դրանց թվում են Երևանի Նոր Նորքի առաջին զանգվածի Լվովյան փողոցի բնակելի շենքերին հարակից հողատարածքները:

Նման փաստեր կան նաև Նոր Նորքի 5-րդ զանգվածում, Երևանի այլ տարածքներում, ինչպես նաև մարզերում: Կոյուղատար համակարգը, «ոռոգման ջուր» ստանալու նպատակով, միտումնավոր վնասվում է շատ տեղերում: Վեոլիան շարունակաբար վերանորոգում է խողովակաշարերը, սակայն հաշված օրեր անց բնակիչները վերականգնում են «ստատուս քվոն»՝ այսպիսով շարունակաբար խաթարելով կոյաջրերի հեռացման գործընթացը:

Բայց և պատասխանատվության ենթարկելը ապօրինությունների հեղինակներին խնդրահարույց է. ապօրինաբար ոռոգվող տարածքները որևէ իրավական կարգավիճակ չունեն:

Խնդրի լուծումը բարդ է, մենք նորոգում ենք կոյուղին, ասում ենք բնակիչներին, որ չի կարելի նման բան անել, իսկ մեր հետևից նրանք նորից գալիս կոտրում են, -  աում է «Վեոլիա Ջուր» ՓԲԸ «Հյուսիս» շահագործման տեղամասի պետ Արամ Գրիգորյանը:

Ջրամատակարար կազմակերպությունը վերջին տարիներին Նոր Նորքի առաջին զանգվածում 2 անգամ նոր կոյուղի է կառուցել, քանի որ գործող խողովակաշարը բնակիչների միջամտությունների հետևանքով ենթակա չի եղել հետագա շահագործման: 

Ներկայումս Վեոլիա ջրի վթարային բրիգադը սկսել է Լվովյան փողոցի ձորի հատվածում կոյուղագծի վերանորոգումը: Անշուշտ, կոյուղու կանոնավոր շահագործումը կվերականգնվի, սակայն խնդիրը մնում է օրակարգային: Այն լուծելու համար նաև տեղական ինքնակառավարման մարմինների օգնությունն է պահանջվում:

Իր հերթին, ընկերության Իրավաբանական ծառայությունը պատրաստվում է դիմել ոստիկանություն՝ խնդրելով օգնել ապօրինությունների հեղինակներին օրենքով սահմանված կարգով պատժելու, բնակիչներին նման արարքների ամբողջ անթույլատրելիությունը բացատրելու, և հետագայում նման ապօրինությունները «Վեոլիա ջուր» ընկերության կողմից շահագործվող համակարգում բացառելու նպատակով»: