Տիրոջ խաչի զորությունը

Հայաստանյայց Առաքելական եկեղեցում այսօր նշվում է Սուրբ վարդապետների հիշատակության օրը, իսկ վաղը կնշվի Խաչի գյուտի օրը: Տեր Նիկողոս քահանա Հովհաննիսյանը, խոսելով Վարագա Սուրբ Խաչի տոնի մասին, ասաց, որ այն Քրիստոսի խաչափայտին նվիրված չորս տոներից մեկն է:

Տեր Նիկողոսը տեղեկացրեց, որ 327թ., երբ բյուզանդական Կոստանդիանոս կայսեր մայրը` Հեղինեն, Տիրոջ խաչը գտնելու նպատակով այցելում է Երուսաղեմ, Հուդա անունով մի հրեա կայսրուհուն օգնում է գտնել Քրիստոսի խաչվելու վայրը` Գողգոթան:

«Որոնումների ժամանակ հայտնաբերվում են Հիսուսի և նրան խաչակից երկու ավազակների խաչերը: Տիրոջ խաչը ճանաչելու համար մի պատանու դիակ տեղավորում են խաչերի վրա, և պատանին հարություն է առնում. այս միջոցով էլ ճանաչվում է տերունական խաչը»,- պատմեց քահանան` հավելելով, որ Գյուտ խաչի տոնը նշվում է Խաչվերացի յոթերորդ կիրակի օրը, որի ժամանակ Առաքելական եկեղեցում սուրբ պատարագ է մատուցվում: