Հայաստանում մեկնարկել է մարդահամարը

Այսօր Հայաստանում մեկնարկել է անկախությունից հետո անցկացվող երկրորդ մարդահամարը, որը կտեւի մինչեւ հոկտեմբերի 21-ը:

Ստեղծվել է մարդահամարի նախապատրաստման եւ անցկացման համապետական հանձնաժողով, որի նախագահը ՀՀ փոխվարչապետ Արմեն Գեւորգյանն է:

Մարդահամարի հարցաշարում 33 հարց է: Բացի անձնական տվյալներից, ներառված են նաեւ այնպիսի հարցեր, ինչպիսիք են համակարգչի կամ ինտերնետի առկայությունը, արտերկրից դրամական միջոցների ստացումը, զուգարանի, լոգասենյակի կամ ցնցուղի առկայությունը եւ այլն: Ի դեպ, մարդահամարի հարցաշարում, ըստ օրենքի, վիճակագրական նպատակների համար չնախատեսված հարցեր չեն կարող ընդգրկվել:

Ըստ «Մարդահամարի մասին» ՀՀ օրենքի` Հայաստանում մարդահամար անցկացվելու է 10 տարին մեկ անգամ: