Հայ ժողովրդի ֆրանսիացի բարեկամի աճյունը կամփոփվի Հայաստանում եւ Արցախում

Ֆրանսիացի խորհրդարանական, հայ ժողովրդի բարեկամ Անրի Սաբին իր կտակում ցանկություն է հայտնել, որ իր աճյունը ամփոփվի երեք վայրում` Ֆրանսիայում, Հայաստանում եւ Արցախում:

Ֆրանսիացի քաղաքական գործիչն իր հայանպաստ գործունեության համար ՀՀ նախագահի կողմից պարգեւատրվել է «Մխիթար Գոշ» շքանշանով, իսկ ավելի վաղ`1990 թվականին Երեւանի քաղաքապետարանը նրան շնորհել էր պատվավոր քաղաքացու կոչում:

1988-ին` Արցախյան շարժումից հետո, Անրի Սաբին Եվրախորհրդարանում մեծապես նպաստել է արցախահայության իրավունքների պաշտպանությանը, աշխատանքային այցելություններ է կատարել Հայաստան եւ Արցախ: Իր երկարամյա քաղաքական գործունեության ընթացքում նա նպաստել է հակամարտությունների կարգավորմանը, մարդու իրավունքների պաշտպանությանը, ժողովուրդների ինքնորոշման իրավունքին, մասնավորապես` որոշիչ դերակատարություն է ունեցել Եվրախորհրդարանի կողմից Հայոց ցեղասպանության բանաձեւի ընդունման գործում: