Հայ սպայի աճյունը հանդիսավորությամբ վերահուղարկավորել է

Բելառուսի Սլավգորոդ քաղաքի մոտակայքում հողային աշխատանքներ իրականացնելիս բանվորները հայտնաբերել են Հայրենական մեծ պատերազմի ժամանակ զոհված 3 կարմիրբանակայինի գերեզման: Նրանցից մեկի ով լինելը հաջողվել է պարզել պահպանված զինվորական մեդալիոնի եւ անձնական իրերի (ատրճանակ, փամփուշտներ, լեյտենանտի համազգեստ) միջոցով:

Ինչպես տեղեկացնում է «Երկրամասը», զոհված լեյտենանտը 1918 վականին Հայաստանում ծնված Խաչիկ Չեխիկյանն է:

Կարմիրբանակայինների աճյունները հանդիսավորությամբ վերահուղարկավորվել են եղբայրական գերեզմանում, որտեղ արդեն հանգչում է մոտ 900 զինվոր, որոնցից 159-ի անունները մինչ օրս անհայտ են:

Ի դեպ, արարողությանը մասնակցել է լեյտենանտի եղբոր թոռը` Սերգեյ Չեխիկյանը, որը պատմել է, որ անհայտ կորած պապին իրենց ընտանիքում երբեք չեն մոռացել: