Ա և Բ տեսակ գրիպները գրոհի են դուրս եկել

Առողջապահության համաշխարհային կազմակերպության տվյալների համաձայն` եվրոպական տարածաշրջանում գրիպի և սուր շնչառական վարակների առումով ներկայումս համաճարակային իրավիճակը լարված չէ: Ըստ նշված կազմակերպության հայտարարության` եվրոպական տարածաշրջանի երկրներում շրջանառվում են գրիպի Ա և Բ տեսակները: Եվրոպական տարածաշրջանի երկրներում ներկայումս նույնիսկ չի դիտվում գրիպի, գրիպանման հիվանդությունների և սուր շնչառական վարակների ինտենսիվ շրջանառություն:

Առողջապահության նախարարությունից տեղեկացնում են, որ մեր երկրում գրիպի և սուր շնչառական վարակների համաճարակային իրավիճակը համեմատաբար հանգիստ է: Գնահատման համար հանրապետությունում իրականացվում է շաբաթական մոնիտորինգ: Չնայած համաճարակային իրավիճակը լարված չէ, սակայն, գրիպի սեզոնի հետ կապված, այսօր ՀՀ ԱՆ հրամանով իրականացվում են կանխարգելիչ միջոցառումներ:

Գրիպից կամ սուր շնչառական վարակներից խուսափելու նպատակով ՀՀ առողջապահության նախարարությունը կրկին զգուշացնում է`

-խուսափե'ք հիվանդների հետ շփումից,

-եթե հիվանդ եք, ապա մնացե'ք տանը,

-եթե հիվանդ եք, հրավիրեք տեղամասային մանկաբույժին, թերապևտին կամ ընտանեկան բժշկին, մի' զբաղվեք ինքնաբուժմամբ,

-հագնվե'ք եղանակին համապատասխան,

-պահպանե'ք հազի և/կամ փռշտալու վարվելակարգը,

-օգտագործե'ք հնարավորինս շատ հեղուկ,

-հաճախակի օդափոխե'ք փակ տարածքները: