Սարկոզին այցելել է Էջմիածին

Ֆրանսիայի նախագահ Նիկոլա Սարկոզին և Հայաստանի նախագահ Սերժ Սարգսյանն այցելել են Մայր Աթոռ Սուրբ Էջմիածին եւ հանդիպել Ամենայն Հայոց կաթողիկոս Գարեգին Բ-ի հետ:

Ողջունելով նախագահների այցը համայն հայության հոգևոր կենտրոն` Վեհափառը գոհունակություն է հայտնել երկու դարավոր բարեկամ երկրների ու ժողովուրդների միջև ամենաբարձր մակարդակի վրա ձևավորված հարաբերությունների կապակցությամբ:

Հայոց հայրապետն առանձնահատուկ ընդգծել է Ֆրանսիայի իշխանությունների հոգատար վերաբերմունքը ֆրանսաբնակ հայորդիների նկատմամբ, ովքեր, վերապրելով Հայոց ցեղասպանությունը, քրիստոնեական լավատեսությամբ և հույսով կարողացան իրենց հոգևոր-ազգային կյանքը կազմակերպել Ֆրանսիայում և այսօր` որպես արժանավոր քաղաքացիներ, իրենց կարևոր ծառայությունն են բերում Ֆրանսիայի առաջընթացին և բարօրությանը:

Նիկոլ Սարկոզին, ի պատասխան, ասել է, որ իր համար մեծ պատիվ է Հայաստանում գտնվելը եւ իր հարգանքն է հայտնել Հայ եկեղեցուն ու Ամենայն Հայոց հայրապետին:

Հանդիպման ավարտին հյուրերն այցելել են Մայր տաճար, եղել Տաճարի թանգարանում, որտեղ նրանց ներկայացվել են Հայ եկեղեցու և հայ ժողովրդի նվիրական սրբությունները: