Ադրբեջանական "սեւ ցուցակը" համալրվել է ամերիկացի սենատորով

Ադրբեջանի արտգործնախարարությունն անցանկալի անձանց ցուցակում ավելացրել է ԱՄՆ Կալիֆոռնիա նահանգի սենատոր Ջոզեֆ Սիմիթյանի անունը, բնականաբար` Արցախ այցի համար: ԱԳՆ-ն դա համարում է «Ադրբեջանի տարածքային ամբողջականության եւ ինքնիշխանության նկատմամբ անհարգալից վերաբերմունք». տեղեկացնում է «Երկրամասը»:

Կալիֆոռնիայի Սենատի շրջակա միջավայրի հանձնախմբի նախագահ Ջոզեֆ Սիմիթյանի գլխավորած պատվիրակությունը սեպտեմբերի վերջին այցելել էր Ադրբեջան: Նրանց ընդունել էր նախագահ Իլհամ Ալիեւը: Ադրբեջանից սենատորը մեկնել էր Արցախ, որտեղ հանդիպումներ էր ունեցել երկրի ղեկավարության հետ, եւ հետագայում իր այցն անվանել էր բեղուն ու կարեւոր:

Սենատորն ասել էր, որ հիացած է ԼՂՀ-ում տեսածով, Ղարաբաղի ժողովրդի ձեռքբերումներով, Ղարաբաղյան հիմնահարցը խաղաղ ճանապարհով լուծելու պատրաստակամությամբ: «Այդ գործընթացում շատ կարեւոր է, որ Ղարաբաղի ժողովրդի ձայնը լսելի լինի»,- ասել էր Սիմիթյանը:

Իր խոսքերով` մոտ 1 մլն մարդ ներկայացնող սենատորը խոստացել է Կալիֆոռնիայի իշխանություններին ու ժողովրդին ներկայացնել Արցախում լսածն ու տեսածը: