ԱԻՄ նախագահին Քոչարյանի վերադարձը չի ոգեւորում

«Ժառանգություն» կուսակցության փոխնախագահ Ռուբեն Հակոբյանի համար անհասկանալի է, որ Հայաստանի երկրորդ նախագահի վերադարձը պայմանավորում են Ռուսաստանում տեղի ունեցող փոփոխություններով, այն էլ` երբ նոր-նոր ենք տոնել անկախության 20-ամյակը:

«Նվաստացնող է, երբ մտածում ես, որ այլ պետության քաղաքական գործընթացների արդյունքում քո պետության մեջ կարող է իշխանության վերադասավորում լինել»,- այսօր լրագրողների հետ հանդիպման ժամանակ հայտարարեց նա` հավելելով, որ անկախ նրանից` Պուտինը կլինի Ռուսաստանի նախագահը, թե Մեդվեդեւը, Հայաստանի նկատմամբ քաղաքական դիրքորոշումը բացարձակապես չի փոխվի:

«Ժառանգության» փոխնախագահն այնուհետեւ նշեց, որ այս ամենից վասալական տրամադրությունների հոտ է առնում:

Ասուլիսի մյուս մասնակիցը` ԱԻՄ նախագահ Պարույր Հայրիկյանն էլ նշեց, որ իր համար անհասկանալի է, երբ երկրորդ նախագահը վերադառնում է ոչ թե որպես կուսակցական գործիչ, այլ` որպես անհատ:

«Կարեն Դեմիրճյանը` որպես հակաանկախական, ջախջախված հեռացավ քաղաքական ասպարեզից, հետո մի տասը տարի անց քնից զարթնեց, որոշ մարդկանց պետք եկավ, եւ նա դարձավ իբրեւ թե մեծ գործիչ. ի՞նչ նպատակով, ի՞նչ ծրագրերով, հայտնի չէ` բացի քաղաքականության գալուց: Լեւոն Տեր-Պետրոսյանն էլ քնեց, հանգստացավ, ութ տարվա ընթացքում գրեց մի գիրք, այսինքն` օրական գրեց 5 տող, հիմա նորից ասպարեզ է գալիս: Իսկ Ռոբերտ Քոչարյանն, ի տարբերություն Կարեն Դեմիրճյանի եւ Լեւոն Տեր-Պետրոսյանի, վերադառնում է ոչ թե որպես կուսակցական գործիչ, այլ` որպես անհատ: Սա ազգային քաղաքական կյանքի համար անհասկանալի երեւույթ է»,- նշեց Հայրիկյանը, ապա հավելեց, որ ինքը նախատրամադրվածություն ունի Ռոբերտ Քոչարյանի դեմ` Մարտի 1-ի պատճառով:

Բացի այդ` ԱԻՄ նախագահը նաեւ հիշեց, որ Ռոբերտ Քոչարյանի օրոք ԱԻՄ-ի գրասենյակները հերթով փակվեցին, նույնիսկ` «Անկախության» թերթի խմբագրությունը:

«Ասում են` Անդրանիկ Մարգարյանն էր վարչապետը, նա է արել, բայց Անդրանիկ Մարգարյանն առանց Ռոբերտ Քոչարյանի չէր էլ փռշտում: Այնպես որ` ես նախատրամադրված եմ եւ կարող եմ այնքան էլ անաչառ չլինել Ռոբերտ Քոչարյանին գնահատելուց»,- նշեց Հայրիկյանը: