Վերակազմավորո՞ւմ, թե՞ կործանում

Կառավարության` սեպտեմբերի 1-ի որոշմամբ Երեւանի ֆիզիկայի ինստիտուտը, որը Հայաստանի ամենախոշոր գիտական հիմնարկներից է, վերակազմավորվել է հիմնադրամի, ընդ որում`  այդ հարցը ինստիտուտի աշխատակիցների հետ չի քննարկվել. այսօր լրագրողների հետ հանդիպման ժամանակ ասաց ֆիզիկամաթեմատիկական գիտությունների դոկտոր Ռուբեն Մկրտչյանը:

Ինստիտուտի 130 գիտաշխատողներից 80-ը իրենց ստորագրությունն են դրել նամակի տակ, որում իրենց դժգոհությունն են հայտնել ինստիտուտի վերակազմավորման կապակցությամբ: Նամակն ուղարկվել է Հայաստանի նախագահին, վարչապետին եւ նախարարներին:

Վերակազմավորման պատճառն ինստիտուտը հիմնարար հետազոտություններով զբաղվող հաստատությունից կիրառական հետազոտություններով զբաղվող հաստատություն, մասնավորապես` միջուկային թերապիայի բժշկական կենտրոն դարձնելն է: Ըստ Ռ. Մկրտչյանի` գաղափարը Կենտրոնական բանկի նախագահի տեղակալ Ներսես Երիցյանն է, ով էլ զբաղեցնելու է նորաստեղծ հիմնադրամի հոգաբարձուների խորհրդի նախագահի պաշտոնը եւ արդեն իսկ ղեկավարում է ինստիտուտը:

Ինստիտուտի աշխատակիցներն այս խնդիրը լուծելու համար դիմել են նաեւ իրենց արտասահմանցի գործընկերներին. վարչապետին ուղղված նամակներ են ստացվել 100 հայտնի ֆիզիկոսների ստորագրությամբ, 20 երկրների 66 համալսարաններից եւ հետազոտական կենտրոններից: