ԱՌԱՎՈՏ. Տղամարդկային արժանապատվությունը` 2 մլն դրա՞մ

Նախորդ օրը Շիրակի մարզի ընդհանուր իրավասության դատարանում շարունակվեց Մինաս Ավետիսյանի որդի Արման Ավետիսյանի` Գյումրու ժուռնալիստների «Ասպարեզ» ակումբի խորհրդի նախագահ Լեւոն Բարսեղյանի դեմ ներկայացրած հայցի նախնական դատաքննությունը:

Որմնանկարչի որդին դատի է տվել Լեւոն Բարսեղյանին` «պատիվն ու արժանապատվությունը արատավորող տեղեկությունների հերքման, հրապարակայնորեն ներողություն խնդրելու պարտավորեցման, պատճառված վնասի հատուցման պահանջով»:

Հայցվորի շահերի ներկայացուցիչ Անի Խլղաթյանը «Առավոտի» հետ զրույցում տեղեկացրեց, որ իրենք ներկայացրել են նյութական պահանջ` 200.000 դրամի չափով եւ 2 մլն դրամ` վիրավորանքի եւ զրպարտության համար: Ըստ նրա` Բարսեղյանը վիրավորել է նաեւ իր վստահորդի տղամարդկային արժանապատվությունը:

«Ասպարեզ» ակումբի նախագահը չի ընդունում հայցը:

Նշենք, որ երեկ դատական նիստի արդյունքում պարզվեց, որ asparez.am կայքում տեղադրված ոչ բոլոր հրապարակումներն են պատկանում Բարսեղյանի գրչին: