Տղամարդկային հասարակություն ենք, որտեղ կանանց ուզում են հիշել դեպքից դեպք

ԱԺ «Ծառուկյան» խմբակցության պատգամավոր Լուիզա Սարգսյանի համար ամբողջ գարունը կանացի տոն  է: «Գարնանային ամեն օր կարելի է կանանց ոգեշնչել, այս միասմյակը հաճելի է, և, բացի ուրախությունից,  կանանց մեծարելու ևս մեկ առիթ է, ինչին որ կանայք արժանի են»,- ասաց նա:

Պատգամավորի խոսքով` կանանց իրավունքների և ազատության համար պետք է ամեն օր պայքարել, իսկ սա պարզապես գեղեցկության ու գարնան տոն է:

Քաղաքագետ Անուշ Սեդրակյանը չի ընդունում, որ կարելի է կանանց միջազգային օր ունենալ:  «Կներեք վատ զուգահեռի համար, բայց ՁԻԱՎ-ի համար էլ ենք պայքարում ամեն օր, և օր կա: Մարտի 8-ն էլ այդպիսի օր է: Այն ինձ համար զուտ սովետական ասոցացիաներ է առաջացնում: Կանանց իրավունքների տոն գուցե պետք է, բայց Հայաստանում ամեն օր պետք է ընթանա կանանց իրավունքների համար պայքարը»,- ասաց նա:

«Հրապարակ» օրաթերթի խմբագիր Արմինե Օհանյանը չի սիրում կանանց տոները: «Այսպիսի տոն սահմանելը, ֆետիշացնելը մի բան է նշանակում` այնքան ոտնահարված են կանանց իրավունքները, որ այսպիսի մի օր են նշել, որպեսզի բացառություն անեն մյուս 364 օրերից: Լավ կլիներ այս օրը չլիներ, բայց լիներ կանանց հավասարության, իրավունքների լիարժեք իրացման հնարավորություն մեր հասարակության մեջ, որից մենք շատ հեռու ենք»,- ասաց նա:

Ավագանու «Ելք» խմբակցության անդամ Անահիտ Բախշյանն էլ տոնը չի սիրում: «Ուզում են` թող տոնեն, բայց հայտարարել կանանց տո՞ն: Համենայն դեպս, տղամարդկային հասարակություն ենք, որտեղ կանանց ուզում են հիշել դեպքից դեպք ու լավագույն դեպքում ականջներս մտցնել` տեսե'ք, միամսյակ ունեք: Ես չեմ ուզում այդ միամսյակը, ես ուզում եմ` տարվա բոլոր օրերին կանանց նկատմամբ լինի հարգալից վերաբերմունք, հավասար հնարավորություն բոլորի համար»,- ասաց նա:

Բախշյանը չհամաձայնեց այն մտքի հետ, որ մեր երկրում կանանց տեղ չեն տալիս, ըստ նրա` ուզեն, թե չուզեն` տալու են, ուզեն-չուզեն` նաև վախենում են: «Կանայքս, ընդունեն, թե չընդունեն, ունենք լուրջ դերակատարում մեր երկրում: Մենք կարող ենք շատ ավելի արժեքավոր և կարևոր բաներ անել մեր պետության մեջ, բացի խոհանոցից»,- նշեց նա:

Անդրադառնալով հարցին` ի՞նչ դեր ունեն կանայք քաղաքականության մեջ, Անուշ Սեդրակյանը նշեց, որ այն մարդիկ, ում ձեռքում են քաղաքական լծակներ, նշանակում են «քաղաքական կանանց», սակայն նա նշեց, որ իրապես քաղաքականությամբ զբաղվող կանայք էլ կան: «Հիտլերյան մի ձևակերպում կար կնոջ մասին` պետք է գնա խոհանոց, ունենա երեխաներ և մտնի եկեղեցի: Մեզ անվերջ ուզում են մտցնել այդ շրջանակի մեջ»,- ասաց նա:

Լուիզա Սարգսյանն էլ նշեց, որ այս գումարման ԱԺ-ում 19 կին կա, սակայն, ըստ նրա, դա չպետք է միայն ֆորմալ լինի: «Երբեք չեմ ուզի, որ քանակ-որակ հարաբերակցությունը խառնվեր: Ինչ վերաբերում է 6-րդ գումարման ԱԺ-ին, ինչ-որ քաղաքական մշակույթ իսկապես փոխվել է, կանանց ավելի շատ ներգրավվածությունը հանդուրժողականություն է բերել»,- ասաց նա: