Ըմբշամարտի աշխարհի առաջնություն. ամփոփում

Թուրքիայի Ստամբուլ քաղաքում կայացած ըմբշամարտի աշխարհի առաջնությունը  լավագույն բանը չէր, որը կարող էր մեզ պատահել: Մի կողմից` թուրքական դատը, մյուս կողմից` ուժեղ մրցակիցները:

Հունահռոմեական ոճի  ըմբշամարտի աշխարհի առաջնությունում Հայաստանն անհաջող մեկնարկեց: 

55 կգ քաշային Ռոման Ամոյանը, ումից սպասելիքները չեմպիոնական  էին,  1/8-րդ եզրափակչում միավորներով պարտվեց Կորեայի ներկայացուցիչ Գյու Ջին Չոյին:

66 կգ քաշային Արման Ադիկյանը 1/16-րդ եզրափակչում պարտվեց ֆրանսիացի Ստիվ Ժենոյին:

Իսկ մեծահասակների հավաքական վերջերս տեղափոխված գյումրեցի` 96 կգ քաշային Արթուր Ալեքսանյանը քառորդ եզրափակչում զիջեց թուրք Ջենկ Իլդեմին. այս մարտի ժամանակ մրցավարը ջանքեր չխնայեց մեր ըմբիշին ձեռնունայն թողնելու համար:

2-րդ օրը միջազգային տատամի դուրս եկավ 84 կգ քաշային Արթուր Շահինյանը, ով  հենց սկզբի մենամարտերից մեկում  լքեց գորգը` պարտվելով ավստրիացի Ամեր Հրուստանովիչին։

1/16-րդ եզրափակչի արգելքը չկարողացավ հաղթահարել նաև 60 կգ քաշային Վահան  Ջուհարյանը: Նա միավորներով պարտվեց Վենեսուելայի ներկայացուցիչ  Լուիս Իգնասիո Լիենդոյին։

120 կգ քաշային Յուրի Պատրիկեևը իր սկզբունքային հակառակորդ և ազգակից Հասան Բարոևին ստիպված չեղավ բախվելու, վերջինս վնասվածքի պատճառով չէր մասնակցում առաջնությանը: Սակայն 1/8-րդ եզրափակչում հայաստանցի ըմբիշը չկարողացավ հաղթահարել կուբացի Միջայի Լոպես Նունիեսի արգելքը։  Իսկ բրոնզե մեդալի համար պայքարում Պատրիկեևը պարտվեց շվեդ Յոհան Մագնուս Էվրունին:

Միջազգային դիմակայության 3-րդ օրը հայերը վերջապես ուշքի եկան: 74 կգ քաշային Արսեն Ջուլֆալակյանը, չնայած այն բանին, որ  պարտվեց թուրք Սելջուկ Ջեբիին` հնարավորություն ստացավ պայքարելու 3-րդ տեղի համար և 2:0, 1:0 հաշվով առավելության հասավ Ղազախստանի ներկայացուցիչ Ասխադ Դիլմուխամեդովի նկատմամբ: Հունահռոմեականներից նա միակն էր, ով օլիմպիական խաղերի ուղեգիր նվաճեց:

Սեպտեմբերի 16-ին մեկնարկած ազատ ոճի ըմբշամարտի աշխարհի առաջնությունից վերադարձանք միայն մեկ ուղեգրով:

55 կգ քաշային Միհրան Ջաբուրյանը  առաջին իսկ գոտեմարտում  պարտվեց  աշխարհի գործող չեմպիոն  ռուսաստանցի Վիկտոր Լեբեդևին: Մեդալ նվաճել չհաջողվեց, սակայն Լոնդոն-2012-ի մեկ ուղեգիր արդեն մեր գրպանում է:

60 կգ քաշային Նարեկ Սանոյանը առաջին իսկ գոտեմարտում տատամին լքեց պարտված, նրա մրցակիցն էր գերմանացի Տիմ Սկլեյչերը:

84 կգ քաշային դաղստանցի  Հաջիմուրադ Նուրմագամեդովը, ով ներկայացնում էր Հայաստանը` զիջեց Թուրքիայի ներկայացուցիչ Սերդար Բոկեյին:

66 կգ քաշային Դավիթ Սաֆարյանը պարտություն կրեց առաջին իսկ մարտում ռուսաստանցի Ադամ Բատիրովից:

74 կգ քաշային դաղստանցի ըմբիշ Մուսսա Մուրթազալիևը, ումից սպասելիքները շատ էին, քառորդ եզրափակչում  պարտվեց ադրբեջանցի Աշրաֆ Ալիևին:  

96 կգ քաշային Հարություն Ենոքյանը, ով մեկնեց առաջնության եղբոր` Էդգարի փոխարեն (վերջինս վիրահատության էր ենթարկվել) 1/16-րդ եզրափակչում զիջեց Հնդկաստանը ներկայացնող Մուսամ Խատրիին: 

Վերջին օրը Հայաստանի ըմբիշներից մեդալին առավել մոտ էր 120 կգ քաշային Ռուսլան Բասիեւը, սակայն բրոնզե մեդալի համար պայքարում  պարտվեց մոնղոլ Չուլուունբատ Յարգալսայխանին:

Անի ՄԵՋԼՈՒՄՅԱՆ