Լևոն Ջուլֆալակյանը ամփոփում է ըմբշամարտի աշխարհի առաջնությունը

Այսօր  լրագրողների հետ  հանդիպման ժամանակ հունահռոմեական ըմբշամարտի Հայաստանի հավաքականի գլխավոր մարզիչ Լևոն Ջուլֆալակյանը ամփոփեց աշխարհի առաջնության արդյունքները: Նա ասաց, որ Արթուր Ալեքսանյանի եզրափակիչ գոտեմարտը դատող դատավորի գործողությունների դեմ նամակ-բողոք կուղարկեն ըմբշամարտի միջազգային ֆեդերացիա, որպեսզի նման բաներ այլևս չկրկնվեն:

«Ցանկացած առաջնության մենք մեկնում ենք հաղթելու համար և մարտական տրամադրված: Նախօրոք ոչինչ պլանավորել չենք կարող, սա սպորտ է, և ամեն ինչ կարող է պատահել: Ընդհանուր առմամբ, գոհ եմ բոլոր արդյունքներից` չնայած մեր բոլոր մեդալակիրներն էլ արժանի էին ոսկե մեդալի և կարող էին պայքարել այդ կոչման համար:

Արսեն Ջուլֆալակյանի գոտեմարտերը բարձր եմ գնահատում: Ճիշտ է նա կրկին պարտվեց Վլասովին, սակայն այս անգամ իր իսկ թույլ տված տակտիկական սխալի պատճառով: Այո,  հաղթանակի բանալին դեռ չենք  գտնել, սակայն կգա ժամանակը, որ կհաղթենք: Անհնար ոչինչ չկա:

Արթուր Ալեքսանյանի եզրափակիչ գոտեմարտում մրցավարների թույլ տված կոպիտ սխալը մեզ զրկեց ոսկուց: Մենք ըմբշամարտի միջազգային  ֆեդերացիային բողոք-նամակ կուղարկենք, որպեսզի նրանք այսուհետ ավելի ուշադիր լինեն, որպեսզի նման բաներ այլևս չկրկնվեն:  Արթուրը վերջին վայրկյաններին չէր լսում մեր հրահանգները: Նա կարծում էր, թե հաղթում է, և դրա համար էլ չէր փորձում միավոր վաստակել:

Ռոման Ամոյանի վերադարձի համար մենք բոլորս պետք է շատ ուրախ լինենք: Այդքան դեպքերից հետո նա կարողացավ վերադառնալ, վերականգնվել և դառնալ աշխարհի բրոնզե մեդալակիր: Նորից ասեմ, որ ընդհանուր արդյունքներից շատ գոհ եմ»,- ասաց նա: