Գալուստ Սահակյանը ՀԱԿ-ին "ոչ" ասաց

ԱԺ ՀՀԿ խմբակցության ղեկավար Գալուստ Սահակյանն այսօր ճեպազրույցի ընթացքում անդրադարձավ Հայ ազգային կոնգրեսի վերջնաժամկետին, որով իշխանություններին մինչեւ սեպտեմբերի 30-ը ժամանակ է տրվում ՀԱԿ ակտիվիստ Տիգրան Առաքելյանին ազատ արձակելու համար, այլապես չեն երկխոսի:

«Դա պրիմիտիվ սցենար է, եւ եթե դրա հետ  է կապված, հենց այսօրվանից էլ կասենք ոչ, որովհետեւ դա  այլ լիազոր մարմնի գործ է եւ քաղաքական լուծումներ ունենալ չի կարող»,- հայտարարեց նա:

Գալուստ Սահակյանը համարում է, որ «քաղաքականության ա-ն ու բ-ն չճանաչող երիտասարդին» մեծ փորձության են ուղղորդել, սակայն խնդրի լուծումը ոչ թե զգացական կամ քաղաքական, այլ իրավական դաշտում է: «Այլ բան է, որ մենք պետք է ուշադրություն դարձնենք` օրենքի շրջանակներում հնարավորը անելու համար»,- ասաց նա:

Պատգամավորը նաեւ հայտարարեց, որ մեր ժողովրդի ճակատագիրն ամենեւին էլ կախված չէ իշխանություն-ՀԱԿ երկխոսությունից: «Երկխոսություն կլինի` ավելի լավ, չի լինի` մեր ժողովուրդը նորից կապրի ու կարարի»,- ասաց նա` ավելացնելով, որ երկխոսությունն ավելի կարեւոր է հենց քաղաքական դաշտի համար: «Բայց մենք պատրաստ ենք երկխոսելու, պատրաստ ենք նաեւ չերկխոսելու»,- ասաց Գ. Սահակյանը: