Հայաստանի պատմա-մշակութային ժառանգության ոչնչացումը միջազգային հանրության ուշադրությունից դուրս է

Ադրբեջանի գործողությունները` ուղղված Հայաստանի պատմա-մշակութային ժառանգության ոչնչացմանը միջազգային հանրության, մասնավորապես` Եվրոպայի ուշադրությունից դուրս են. Մոսկվայում Ռուբեն Գալիչյանի «Պատմության առասպելականացում. Ադրբեջան, Հայաստան, հերյուրանքներ եւ փաստեր» գրքի շնորհանդեսի ժամանակ ասել է Կովկասի հարցերով առաջատար ռուսաստանցի փորձագետ Անդրեյ Արեշեւը:

«Հայկական դիվանագիտության, հայկական իշխանությունների պասիվության փաստը տեղի ունի, եւ ոչ պակաս կարեւոր գործոն է անբարենպաստ տեղաշարժերի համար, որոնք նկատվում են այսօր: Հայաստանում երեւի համոզված են, որ կարիք չկա սեփական քարոզչությունն իրականացնել եւ բացատրել սեփական դիրքորոշումը»,- համարում է նա:

Մինչդեռ Ադրբեջանն իր եվրոպացի գործընկերների հետ բավական արդյունավետ է գործում: «Դա զգացվում է շփումներում եւ գնահատականներում, որոնց մենք հանդիպում ենք վերլուծական փաստաթղթերում: Դա այն բանի օրինակն է, թե ինչպես, թվում է, թե հումանիտար հիմնախնդիրը ունի զուտ քաղաքական չափողականություն»,- նշել է կովկասագետը: