Ջրի փոխարեն` նավթ

Բաթումի մոտակայքում գտնվող Բարցխանա ավանում բնակարանների ծորակներից խմելու ջրի փոխարեն նավթ է հոսում. հաղորդում է վրացական «Նովոստի Գրուզիա» լրատվական կայքը:

Դեպի ավան ձգվող ջրագծի վերականգնողական աշխատանքների հետ կապված` հաճախ են դադարեցնում ջրամատակարարումը, եւ հարակից վնասված նավթամուղից ջրագծի մեջ անարգել լցվում է նավթ:

Նավթային տերմինալի ղեկավարության ներկայացուցիչները հայտարարել են, որ վնասվածքներն արդեն վերացվել են, սակայն մինչ օրս բնակարանների ջրի ծորակներից նավթը շարունակում է հոսել:

Արդեն երկու օր է, ինչ ավանի բնակչությունն ստիպված է անձրեւաջուր օգտագործել:

Լրատվական կայքը նշում է նաեւ, որ «Բաթում ջուր» ընկերության տեխնիկական տնօրենը հրավիրվել է դատախազություն։