Շուտով ասուլիսի էլ չեն գա

Իշխանական մեր աղբյուրները հայտնում են, որ ՀՀԿ վերնախավի ներկայացուցիչները խիստ նկատողություն եւ նախազգուշացում են ստացել` մամուլի ասուլիսներում եւ հարցազրույցներում «շատ խոսելու» համար:

Նախազգուշացումը հատկապես արդիական է դարձել ՀԱԿ-իշխանություն երկխոսության եւ դրա առկախման ֆոնին, երբ որոշ հանրապետականներ` անկախ իրենց կամքից, մի քիչ ավելին են ասել, քան պետք էր: Թերեւս, հենց դրանով է բացատրվում լրագրողների հետ շփումներում աչքի ընկնող ՀՀԿ-ականների` վերջին շրջանում որդեգրած խիստ զգուշավոր կեցվածքն ու ասուլիսներում հնչող «լղոզված» պատասխանները:

ԱԺ ՀՀԿ խմբակցության ղեկավար Գալուստ Սահակյանից հետո օրերս նման խիստ նկատողության է արժանացել նաեւ ՀՀԿ պատգամավոր Գագիկ Մինասյանը, երբ ասուլիսներից մեկում լրագրողները նրա բերանից բառացիորեն աքցանով հանեցին բառեր ու արտահայտություններ, որոնք նա հակված չէր բարձրաձայնելու: