Երկխոսությունը չկայացավ

Այսօր` ժամը 10:00-ին, պետք է տեղի ունենար ՀԱԿ-իշխանություն երկխոսության հերթական հանդիպումը: Սակայն այն անհայտ պատճառներով հետաձգվել է:

Փորձեցինք պարզել, թե ինչու հանդիպումը չի կայացել: Կառավարության հանդիսությունների տան մուտքը հսկող ոստիկաններն ասացին, որ կողմերը չեն ներկայացել: Իսկ ՀԱԿ մամուլի խոսնակ Արման Մուսինյանը ԵՐԿԻՐ-ին ասաց, որ այսօր` ժամը 13-ին, ՀԱԿ գրասենյակում նախատեսված է Կոնգրեսի համակարգող Լեւոն Զուրաբյանի մամլո ասուլիսը, ոի ընթացքում էլ կհնչեն բոլոր հարցերի պատասխանները:

Հիշեցնենք, որ նախորդ հանդիպման ժամանակ, որը տեւել էր ավելի քան 5 ժամ, կոալիցիան ներկայացրել էր արտահերթ ընտրությունների անհրաժեշտությունը բացառող` իր ավելի քան 130 էջանոց փաստաթղթի 2/3-ը: Իսկ այսօր նախատեսվում էր շարունակել փաստաթղթի ընթերցանությունը:

Թե ինչո՞ւ չի կայացել հանդիպումը, եւ կկայանա՞, արդյոք, ընդհանրապես, այս պահին դժվար է ասել: Եթե կողմերը որոշել են դադարեցնել հանդիպումները, ապա ինչո՞ւ հիմա, այս պահին: Սրանք հարցեր են, որոնք պատասխաններ են պահանջում: