Արագածոտնի մարզպետի եղբայրը մարդ է ծեծել

Արագածոտնի մարզի Սասունիկ գյուղի բնակիչ, 7 երեխաների հայր 38-ամյա Ժորա Նազարյանն օգոստոսի 23-ի գիշերը ծեծի է ենթարկվել: Ծեծողը եղել է մարզպետ Սարգիս Սահակյանի եղբայրը` «Հայդուկ» ՀԿ-ի նախագահ Նաիրի Սահակյանը. տեղեկացնում է «Հրապարակը»:

Ժորա Նազարյանն ապրում է վագոն-տնակում և ըստ տվյալների փորձել է ընդամենը բողոքել գյուղում անցկացվող ջրագծից: Նա դիմել է ոստիկանության Աշտարակի բաժին` ասելով, որի իրեն «Նաիրի» ռեստորանային համալիրում ծեծել են Ն. Սահակյանը, Ա. Մնացականյանը եւ Ա. Մարտիրոսյանը (վերջին երկուսը «Հայդուկ» ՀԿ-ի անդամներ են, Սասունիկի բնակիչներ):

«Ուսի եւ դեմքի մասերում նրանց հասցվել են մարմնական վնասվածքներ: Ժ. Նազարյանին տրվել է դատաբժշկի ուղեգիր: Կատարվում է հետաքննություն»,- թերթին ասել են ոստիկանության լրատվական բաժնից:

Ի դեպ, Ն. Սահակյանը մտադիր է դառնալ ԱԺ պատգամավոր, և իշխանական աղբյուրները նշում են, որ նա փոխարինելու է Խաչիկ Մանուկյանին:

Վերջում թերթն ավելացնում է. «Որոշ մարզեր վերածվել են իսկական խանությունների, որտեղ անգամ մարզպետից արված բանավոր դժգոհությունը կարող է նրան ծեծի ենթարկելու պատճառ դառնալ»: