«Ինձ ոչ մեկ չի կարա ոչ մի ձևի…». նախկին մարզպետի՝ պատգամավոր դառնալ ցանկացող եղբայրը բորբոքվեց

«Ժամանակ» թերթն այսօր գրել էր, որ Բազմասեր Առաքելյանն այժմ թիրախավորել է Արագածոտն մարզի նախկին մարզպետ Սարգիս Սահակյանի եղբորը՝ ՀՀԿ ռեյտինգային ցուցակով առաջադրված Նաիրի Սահակյանին։ Նրա հետ հարաբերությունները եւս լարված են։ Նաիրի Սահակյանի հետ լարված է նաեւ ՀՀԿ-ական, սակայն ԲՀԿ ռեյտինգայինով առաջադրված Խաչիկ Մանուկյանը:

Yerkir.am-ի հետ զրույցում Արագածոտնի նախկին մարզպետ Սարգիս Սահակյանը նշեց, թե իրենք նման խնդիր չունեն:

«Մենք ընդհանրապես ոչ մեկի հետ` լինի ընդդիմադիր, լինի իշխանամետ, լինի հանրապետական, ռեյտինգային թեկնածուներից որևէ մեկի հետ բացասական հարաբերություններ չունենք, բացարձակապես նման խնդիր չունենք և չի էլ լինելու»,- ասաց նա:

 Եղբայրն էլ՝ հանրապետական Նաիրի Սահակյանը,  բորբոքված հայտարարեց. «Ինձ ճանաչողները գիտեն, որ ինձ ոչ մեկ չի կարա ոչ մի ձևի… Մենք հանգիստ զբաղված ենք մեր գործերով, ու հաղթանակն էլ մեզ հետ է: Մեզ մի' անհանգստացրեք նման հարցերով»:

Ուշագրավ է, որ, ըստ մարզում շրջանառվող խոսակցությունների, մարզի բնակիչների հետ հանդիպումների ժամանակ Նաիրի Սահակյանը հայտարարել է, թե եղբոր համար է առաջադրվել, և որ որքան գումար ունի հավաքած, բաժանելու է՝ անցնելու համար:

Հիշեցնենք նաև, որ ԱԺ ԲՀԿ խմբակցության պատգամավոր, այժմ ՀՀԿ ցուցակով ռեյտինգային թեկնածու Բազմասեր Առաքելյանի անունն էլ կապվում է «մի շարք ծեծերի» հետ: Նախ ծեծկռտուք է եղել Բազմասեր Առաքելյանի և «Ծառուկյան» դաշինքով առաջադրված թեկնածուներից մեկի միջև, ապա նրա մի քանի տասնյակ կողմնակիցներ Առաքելյանի տուն են հրավիրել համագյուղացիներից մեկին ու, տեղեկանալով, որ նա քվեարկելու է Դաշնակցության օգտին, ծեծի են ենթարկել նրան: