Համահայկական խաղերում պարտվողներ չկան

ՀՀ Սփյուռքի նախարար Հրանուշ Հակոբյանն այսօր ընդունել է Համահայկական 5-րդ խաղերի Ստամբուլի կոմիտեի պատվիրակությանը, որի կազմում էին կոմիտեի ատենապետ Ղազարոս Ունանը, փոխատենապետներ Կարո Համամջիօղլուն, Գարուն Գովանը, անդամներ Հայկարամ Կարասուն, Ռոմանոս Ջեզվեջյանը և Նազար Հանչերը:

Համահայկական 5-րդ խաղերին Ստամբուլից ժամանել է 150 հոգուց բաղկացած պատվիրակություն: Ստամբուլահայ մարզիկները մրցում են 8 մարզաձևում` ֆուտբոլ, ֆուտզալ, վոլեյբոլ, բասկետբոլ, թենիս, լող, թեթև ատլետիկա և շախմատ:

Ողջունելով հյուրերին` ՀՀ սփյուռքի նախարար Հրանուշ Հակոբյանն ուրախությամբ նշեց, որ Հայաստանի անկախության 20-ամյակին նվիրված «Միասնություն սպորտի միջոցով» նշանաբանով անցկացվող Համահայկական 5-րդ խաղերին Ստամբուլից ժամանած պատվիրակությունն ամենամեծաթիվներից է:

«Համահայկական խաղերում պարտվողներ չկան, համահայկական խաղերում հաղթում են բոլորը. հաղթում է հայը, հայությունը»,- նշեց նախարար Հ.Հակոբյանը:

Հանդիպման ընթացքում քննարկվեցին ստամբուլահայության կրթական, մշակութային, երիտասարդության հիմնախնդիրներին առնչվող հարցեր: Պայմանավորվածություն ձեռք բերվեց ՀՀ սփյուռքի նախարարության ծրագրերին և միջոցառումներին առավել ակտիվ մասնակցելու և համագործակցությունը զարգացնելու վերաբերյալ: