Պաշտպանվելիս հարվածեք շնաձկան աչքերին

ՌԴ արտակարգ իրավիճակների նախարարությունը Պրիմորսկի բնակիչների համար ցուցանակներ է տեղադրել, որոնցում նշվում է, թե ինչպես պետք է վարվել շնաձկան հարձակման դեպքում. հաղորդում է ИТАР-ТАСС-ը:

Նշենք, որ արդեն շնաձկների հարձակման երկու դեպք է գրանցվել Պրիմորսկի շրջանում. տուժել են 16-ամյա եւ 25-ամյա երիտասարդներ:

Ցուցանակում նշված է տասը խորհուրդ, մասնավորապես` ԱԻՆ աշխատակիցները խորհուրդ են տալիս ձեռքի տակ եղածով հեռու մղել շնաձկանը, հարվածել նրա աչքին կամ խռիկներին:

Փրկարարները խորհուրդ են տալիս նաեւ շնաձկանը տեսնելիս խուճապի չմատնվել, կտրուկ շարժումներ չանել եւ խաղաղ լողալ դեպի նավակը կամ ափը, սակայն շնաձկանը բաց չթողնել ուշադրության կենտրոնից` համապատասխան ինքնապաշտպանական միջոցներ ձեռնարելու համար: Շնաձկից փախչելն անօգուտ է, քանի որ այն ավելի արագ է լողում:

Շնաձկներն անմիջապես չեն հարձակվում: Մինչ այդ նրանք մի քանի անգամ պտտվում են իրենց հետաքրքրող օբյեկտի շուրջը:

Փրկարարները խորհուրդ են տալիս չլողալ այնպիսի վայրերում, որտեղ ձուկ են որսում, քանի որ վիրավորված ձկան հոտը կարող է գրավել գիշատչին: