Ամերիկյան ռազմական գաղտնիքն ընկել է չինացիների ձեռքը

Պակիստանի իշխանությունները թույլատրել են չինացի ռազմական ինժեներներին լուսանկարել, նույնիսկ որոշ դետալներ վերցնել ամերիկյան անտեսանելի Blackhawk («Սեւ շահեն») ուղղաթիռից, որն ամերիկյան հատուկ ծառայությունները կիրառել էին Ուսամա բեն Լադենի ոչնչացման գործողության ժամանակ:

Չնայած ԿՀՎ-ի խնդրանքներին` չինացիներին մոտ չթողնել ամերիկյան ուղղաթիռին, Պակիստանն, այնուամենայնիվ, գնացել է այդ քայլին, ինչը ցույց է տալիս, որ Իսլամաբադի հարաբերությունները Վաշինգտոնի հետ վերջին շրջանում վատացել են, իսկ Պեկինի հետ, ընդհակառակը, լավացել:

«ԱՄՆ-ը տեղեկություններ ունի, որ Պակիստանը, ավելի ճիշտ` պակիստանյան ներքին հետախուզությունը` ISI-ն, չինացի զինվորականներին թույլ է տվել ուսումնասիրել վթարված ուղղաթիռի դետալները»,- Financial Times-ին ասել է ամերիկյան հետախուզության ներկայացուցիչը: Նա նաեւ հավելել է, որ պակիստանցիները չինացիներին հնարավորություն են տվել պարզել, թե ինչպես է աշխատում «Սթելս» տեխնոլոգիան, որն ուղղաթիռն անհետացնում է ռադարների էկրաններից:

Նշենք նաեւ, որ Պակիստանի հետախուզությունը հերքել է այդ տեղեկատվությունը:

Ուսամա բեն Լադենի ոչնչացման գործղությանը մասնակցել է 2 ուղղաթիռ, որոնցից մեկը վնասվել էր, եւ ամերիկացիները պայթեցրել էին այն, որպեսզի ոչնչացնեն դրա` պետական գաղտնիք հանդիսացող սարքավորումները, սակայն ամբողջությամբ այն վերացնել, փաստորեն, չի հաջողվել: