Հզորագույն երկրաշարժի սպառնալիք

Կանադայի խաղաղօվկիանոսյան ափին` տեկտոնական երկու սալերի շփման տեղում սեյսմիկ էներգիա է կուտակվում, որը սպառնում է հզորագույն երկրաշարժ առաջացնել: Նման եզրակացության են հանգել Սայմոն Ֆրեյզերի համալսարանի երկրաբանները, որոնք ավարտել են Խուան դե Ֆուկի տեկտոնական սալի եւ հյուսիսամերիկյան մայրցամաքային սալի միջեւ անցնող 200 կիլոմետրանոց «անցումային գոտու» ուսումնասիրությունները Վանկուվեր կղզում:

Nature Geoscience ամսագրում հրապարակված երկրաբանահետախուզական տվյալները վկայում են, որ երկրաբանական խզվածքն այդ շրջանում 7 կիլոմետրով խորն է, քան համարվում էր առաջ, այն անցնում է նստվածքային ապարներով եւ ձգվում դեպի արեւելք:

«Եթե երկրաշարժ տեղի ունենա, այն ավելի մեծ տարածք կընդգրկի, քան կարծում էինք»,- ասել է համալսարանի պրոֆեսոր Էնդի Քալվարտը:

Խաղաղօվկիանոսյան ափը Կանադայի ամենաակտիվ սեյսմիկ տարածքն է: Վերջին 70 տարիներին Վանկուվեր կղզում արձանագրվել է մոտ 100 ստորգետնյա ցնցում` 5 եւ ավելի բալ մագնիտուդով: