Հայտնաբերվել է Փիլիպոս առաքյալի գերեզմանը

Թուրքիայի Փամուկքալե` Բամբակե ամրոց կոչվող վայրում, որը հայտնի է իր տաք աղբյուրներով, որոնցում, ըստ լեգենդի, լոգանք է ընդունել Եգիպտոսի թագուհի Կլեոպատրան, միջազգային հնագիտական արշավախումբը հայտնաբերել է Փիլիպոս առաքյալի գերեզմանը:

«Ահա քանի տարի է` մենք փորձում էինք գտնել Սբ Փիլիպոսի վերջին հանգրվանը: Եվ վերջապես մեր որոնումները հաջողությամբ պսակվեցին: Այդ հուշարձանը հայտնաբերվեց հին եկեղեցու ավերակներում»,- պատմել է արշավախմբի ղեկավար Ֆրանչեսկո Անդրիան:

Ինչպես տեղեկացնում է CNN turk-ը, նա հավելել է, որ գերեզմանը դեռ չի բացվել, սակայն «կգա օրը, եւ այդ իրադարձությունն, անշուշտ, տեղի կունենա»:

Անտիկ Հիերապոլիս քաղաքը, որտեղ գտնվում է Փամուկքալեն, կարեւոր դերակատարություն է ունեցել քրիստոնեության տարածման գործում: Սբ Փիլիպոսն այնտեղ է նահատակվել 81-95 թվականներին: Քաղաքում նրա անունով եկեղեցի է կառուցվել, որը համարվել է Փոքր Ասիայի կարեւոր քրիստոնեական սրբատեղիներից մեկը: