Արցախում հանցագործությունների թիվը նվազում է

Ինչպես վերջին մի քանի տարիներին,  այս տարվա առաջին կիսամյակում եւս Արցախում հանցագործությունների նվազում է գրանցվել. այսօր դատախազության կոլեգիայի նիստից հետո հրավիրված մամուլի ասուլիսի ժամանակ հայտարարել է ԼՂՀ գլխավոր դատախազ Արշավիր Ղարամյանը։

Այս տարվա առաջին կիսամյակի արդյունքներով՝ հանրապետությունում գրանցված հանցագործությունները նվազել են 16.8 տոկոսով. գրանցվել է 178 հանցագործություն՝ նախորդ տարվա նույն ժամանակահատվածի 214 հանցագործության փոխարեն։ Հանցագործությունները, ըստ դատախազի, համարյա կրկնապատկվել են Շահումյանի շրջանում, դրանք հիմնականում սեփականության դեմ ուղղված հանցագործություններ են։

Քաշաթաղի շրջանում այդ ցուցանիշն անփոփոխ է մնացել. այս տարվա առաջին կիսամյակում գրանցվել է 14 նման դեպք, 50 տոկոսը դարձյալ սեփականության դեմ ուղղված հանցագործություններ են։

Մայրաքաղաք Ստեփանակերտում հանցավորության վիճակի մասին հարցին ի պատասխան գլխավոր դատախազն ասել է, որ հանցագործությունների նվազում է նկատվել՝ նախորդ տարվա նույն ժամանակահատվածի 76 դեպքի փոխարեն այս տարի գրանցվել է 51-ը։

Գլխավոր դատախազը հայտարարել է, որ հանրապետությունում կազմակերպված հանցավորություն, հանցավոր խմբավորումներ չկան։