Forbes-ի թվերից կյանքը չի փոխվում

Ի՞նչ տարբերություն` երբ մենք Forbes-ի ցուցանիշներով վերջին երկրորդ տեղում ենք եւ ունենք տարեկան 30 հազար արտագաղթող, կամ չորրորդ տեղում ենք եւ դարձյալ ունենք 30 հազար արտագաղթող: Այս հարցն այսօր լրագրողների հետ հանդիպման ժամանակ բարձրացրեց կառավարման փորձագետ Հարություն Մեսրոբյանը:

«Ճիշտն ասած`  ամեն երեւույթ վերլուծելիս ես շատ քիչ ուշադրություն եմ դարձնում թվային մասին: Այսինքն` Forbes-ով Մադագասկարը առաջինն է, թե վերջինը, կարեւոր չէ: Եթե վաղը պարզվի, որ իրենք ինչ-որ բան հաշվի չեն առել եւ Հայաստանից առաջ մի հատ էլ Գվինեա կա, դրանից ոչինչ չի փոխվի»,- նշեց նա:

Բանախոսի խոսքերով` այսօր խնդիրը մեր երկրի` թե' աշխարհի մակարդակով, թե' ներպետական դաշտում անմրցունակ լինելն է: Իսկ Forbes-ի տվյալները ոչինչ չեն փոխում, եթե այսօր մեր երկրում կա խոշոր չափերի հասնող արտագաղթ, բիզնեսները տեղափոխում են Վրաստան:

«Մենք որակապես ծուղակի մեջ ենք: Հայաստանը, որպես երկիր, քանդվում է` տնտեսական, սոցիալական, քաղաքական եւ այլ առումներով»,- ասաց Հ. Մեսրոբյանը: