Ծուխ առանց կրակի...

Տասնյակ տարի շարունակ նույն անհեթեթ հարցն է հնչում. այսօր հրավիրված մամուլի ասուլիսում, դիմելով լրագրողներից մեկին, ով հետաքրքրվել է` արդյո՞ք Արթուր Բաղդասարյանը որեւէ առնչություն ունի մասոնների հետ, ասել է ԱԺ ՕԵԿ խմբակցության ղեկավար Հեղինե Բիշարյանը:

«Ցանկացած լրագրող պետք է իր արժանապատվությունը բարձր պահի եւ բամբասանքների հենքի վրա ավելորդ հարցեր չտա, հարցեր, որոնք առնչվում են բացարձակապես ստի հետ»,- խորհուրդ է տվել Բիշարյանը` հավելելով, որ լավ կլինի, եթե հրապարակեն մասոնների ցուցակը, եւ ի վերջո, բոլորը հանգստանան`տեսնելով, թե ովքեր են նրանք:

Նշենք, որ վերջերս մամուլում հաճախ էր գրվում այն մասին, որ ՕԵԿ նախագահ Արթուր Բաղդասարյանը հանդիպել է Հայաստան այցելած ֆրանկմասոնական մեծ վարպետ Գի Արսիզեի հետ, սակայն ՕԵԿ մամուլի քարտուղար Սուսաննա Աբրահամյանը հերքել էր այդ տեղեկատվությունը` հայտարարելով, որ ՕԵԿ նախագահ Արթուր Բաղդասարյանը Ֆրանսիայի Մեծ Արեւելք օթյակի մեծ վարպետ Գի Արսիզեի հետ չի հանդիպել եւ որեւէ առնչություն չունի ո՛չ այդ, ո՛չ էլ նմանատիպ այլ կազմակերպությունների հետ: