ՀՀԿ-ն արձագանքում է Տեր-Պետրոսյանին

«Դա Լեւոն Տեր-Պետրոսյանի կարծիքն է, նա իրավունք ունի իր կարծիքը հայտնելու, անկախ այն բանից, այդ կարծիքն իրականության հետ կապ ունի, թե ոչ»,- այսպես է մեկնաբանել ՀՀԿ մամլո խոսնակ Էդուարդ Շարմազանովը  երեկ ՀԱԿ հանրահավաքում ՀԱԿ առաջնորդ Լեւոն Տեր-Պետրոսյանի հնչեցրած այն միտքը, թե վաղ թե ուշ իշխանությունը կզիջի եւ բանակցության ձեւաչափով երկխոսություն կսկսի ՀԱԿ-ի հետ, որ առայժմ պարզապես չի կողմնորոշվում:

ՀՀԿ մամլո խոսնակն ասել է, որ անտրամաբանական են  զիջողականության մասին Տեր-Պետրոսյանի արտահայտած մտքերը. «Ինչպես կարելի է մի բան զիջել, որի նախաձեռնողը դու ես: Երկխոսության նախաձեռնողը մենք ենք եղել, եւ նախագահը երկխոսության հեռանկարի հետ կապված իր վերջին հայտարարության մեջ շատ հստակ պատասխան է տվել: Ավելին, քաղաքական ընդդիմությանը հստակ ասել է, որ իր աշխատակազմի ղեկավարը, ԱԺ նախագահն ու վարչապետը պատրաստ են ազգային կարեւորության հարցերը քննարկել ՀԱԿ-ի հետ, քանի հոգանոց պատվիրակությամբ իրենք ուզում են»,- ասել է  Շարմազանովը  ու հավելեց, որ որպես ՀՀԿ խոսնակ նախկինում էլ նշել է, որ ՀՀԿ-ն պատրաստ է ՀԱԿ-ի կառուցողական առաջարկները հնչեցնել խորհրդարանում:

Սրանից ժողովրդավարական առաջարկ Էդուարդ Շարմազանովը չի պատկերացնում: «Այնպիսի տպավորություն է, որ ՀԱԿ-ն ուզում է ոչ թե երկխոսության գնալ, այլ ավելի շատ աղմուկ  անել, որպեսզի զգացմունքային ֆոն ապահովի եւ  դժգոհ զանգվածի համակրանքին արժանանա»,-հավելել է ՀՀԿ խոսնակը:

Ինչ վերաբերվում է Տեր-Պետրոսյանի այն հայտարարությանը, թե իշխանությունն առայժմ չի կողմնորոշվում, ՀՀԿ խոսնակն ասել է.«Մենք, ի տարբերություն որոշ մոլորյալների, շատ լավ կողմնորոշված ենք: Մենք գտնում ենք, որ երկրում ժողովրդավարական բարեփոխումները պետք է շարունակվեն, երկիրը չպետք է տանել  ցնցումների, երկրում քաղաքական պրոցեսները բացառապես պետք է լինեն երկխոսության ու համագործակցության ճանապարհով եւ դատապարտված են բոլոր  նրանց փորձերը, ովքեր կփորձեն երկիրն այլ ճանապարհով տանել»: