Մրցումներ՝ նվիրված Գարեգին Նժդեհի ծննդյան 125-ամյակին

Երևանում կայացել է Գարեգին Նժդեհի ծննդյան 125-ամյակին նվիրված` դպրոցականների «Դիպուկ հրաձիգ» հանրապետական մրցումների եզրափակիչ փուլը, որին մասնակցել են հանրապետության բոլոր մարզերը և Երևանը ներկայացնող շուրջ 18 թիմ. տեղեկացնում է ՀՀ կրթության եւ գիտության նախարարությունը:

Առաջին տեղը գրավել է Լոռու մարզի Վանաձոր քաղաքի թիվ 9 միջնակարգ դպրոցի, երկրորդ և երրորդ տեղերը, համապատասխանաբար, Կոտայքի մարզի Գեղաշենի և Գյումրու թիվ 12 դպրոցների թիմերը:

Տղաների անհատական առաջնությունում առաջին տեղը զբաղեցրել է Սյունիքի մարզի Կապանի թիվ 1 դպրոցի աշակերտ Տիգրան Հարությունյանը, երկրորդ և երրորդ տեղերը, համապատասխանաբար, Գեղարքունիքի մարզի Մարտունու թիվ 2 դպրոցի սաներ Արմեն Մնացականյանը և Գագիկ Բաղիշջանյանը:

Աղջիկների անհատական առաջնությունում առաջին տեղը գրավել է Վանաձորի թիվ 19 դպրոցի աշակերտուհի Սերինե Չիլինգարյանը, երկրորդը` Կապանի թիվ 1 դպրոցի աշակերտուհի Մարիանա Գասպարյանը և երրորդը` Քանաքեռ-Զեյթուն համայնքի 127-րդ դպրոցի աշակերտուհի Անժելիկա Բդոյանը:

Հաղթող թիմերը և մրցանակակիրները պարգևատրվել են ՀՀ կրթության և գիտության նախարարության մեդալներով և վկայագրերով: