ՀՅԴ-ՖԱԹՀ` հանդիպում Հայաստանում

Աշխատանքային այցով Հայաստանում գտնվող պաղեստինյան ՖԱԹՀ կուսակցության միջազգային հարցերով համակարգող Նաբիլ Շաասի ղեկավարած պատվիրակությանն այսօր ՀՅԴ Բյուրոյի «Քրիստափոր Միքայելյան» կենտրոնում ընդունել են ՀՅԴ ներկայացուցիչները` ՀՅԴ Բյուրոյի անդամ Լեւոն Մկրտչյանի եւ ԱԺ պատգամավոր Միքայել Մանուկյանի գլխավորությամբ:

Լեւոն Մկրտչյանը, ողջունելով հյուրերին, հույս է հայտնել, որ Հայաստան կատարած այցը կնպաստի երկու երկրների հարաբերությունների պաշտոնականացմանը: Նաբիլ Շաասը նկատել է, որ իրենց ցանկությունն է՝ երկու բարեկամ երկրներում փոխադարձաբար բացել դեսպանատներ, եւ ՀՅԴ ներկայացուցիչներին ներկայացրել է արաբա-իսրայելական հակամարտության ներկայիս փուլը, նաեւ նշել, որ սեպտեմբերին Պաղեստինը դիմելու է ՄԱԿ-ին` իր անկախությունը ճանաչելու խնդրանքով:

Լեւոն Մկրտչյանը նշել է, որ ՀՅԴ-ն պատրաստ է միջազգային ցանկացած ատյանում աջակցել պաղեստինցիների պայքարին:

Անդրադարձ է եղել նաեւ Արցախի հարցի բանակցային ներկա հանգրվանին, Պաղեստինում եւ Երուսաղեմում հայության իրավունքներին առնչվող հարցերին, ինչպես նաեւ երկու կուսակցությունների համագործակցությունը սերտացնելու հնարավորություններին:

Նաբիլ Շաասը ՀՅԴ ներկայացուցիչներին պաշտոնապես հրավիրել է Պաղեստին:

Մինչ հանդիպումը ՖԱԹՀ կուսակցության պատվիրակությունն այցելել է Ծիծեռնակաբերդ եւ հարգանքի տուրք մատուցել Ցեղասպանության զոհերի հիշատակին, նաեւ եղել է Ցեղասպանության թանգարան-ինստիտուտում: