Վարչապետը էլի դժգոհ է

Երեկ Արցախի վարչապետ Արա Հարությունյանի մոտ շրջվարչակազմերի ղեկավարների մասնակցությամբ հրավիրված խորհրդակցության ժամանակ քննարկվել է գարնանացանի ընթացքը:

Գյուղնախարար Արմո Ծատրյանի գնահատմամբ՝  գարնանացանի հետ կապված բոլոր աշխատանքներն ընթանում են նորմալ: Հանրապետությունում կատարվել է ավելի քան 7000 հա գարնանացան, որը 3000 հա-ով ավելի է` նախորդ տարվա համեմատ:

Եղանակային վատ պայմանների պատճառով պետությունից ստացած` շուրջ 1000 հա-ի  համար նախատեսված եգիպտացորենի սերմացուն ֆերմերները հետ են վերադարձնելու։

Սակայն վարչապետը հողօգտագործողների հետ տարված դասընթացների արդյունքներից գոհ չէ. շատերը շարունակում են աշխատանքներն իրականացնել` խախտելով ագրոկանոնները: Ժամանակին սրսկումներ չկատարելը հանգեցրել է նրան, որ դաշտերը լցվել են մոլախոտերով: Դրանք վերացնելը ոլորտի պատասխանատուների ամենաառաջնահերթ խնդիրն է: Վարչապետը հորդորել է հետեւողական պայքար իրականացնել մոլախոտերի դեմ եւ արդյունքների մասին զեկուցել:

Խորհրդակցության ընթացքում քննարկվել է նաեւ անհրաժեշտ մասնագետների` մեխանիզատորների, գյուղատնտեսների, անասնաբույժների պակասի հարցը: Նրանց համար դասընթացներ կազմակերպելու, ինչպես նաեւ աշխատավարձերը վերանայելու առաջարկություններ են հնչել: Դրանք առաջիկայում կներկայացվեն երկրի ղեկավարի քննարկմանը: