Բուրջանաձեի ամուսինը ինքն էլ չգիտի, թե որտեղ է

Վրացական արմատական ընդդիմության առաջնորդ Նինո Բուրջանաձեի ամուսնու` Բադրի Բիցաձեի հետ, որն անհետ կորել էր հատուկ ծառայություների կողմից այս գիշեր ընդդիմության ցույցը ցրելու ժամանակ, «Պիրվելի» լրատվական գործակալությանը հաջողվել է կապ հաստատել:

«Ինձ լավ եմ զգում, սակայն չգիտեմ, թե որտեղ եմ գտնվում, փորձում եմ պարզել»,- ասել է նա` պատասխանելով հարցին` Թբիլիսիո՞ւմ է, թե՞ մայրաքաղաքի սահմաններից դուրս:

«Լավ նշան է, որ պատասխանում եմ զանգին, սակայն եթե իմանայիք` ինչպես են մեզ գաղտնալսում»,- հայտարարել է Բիցաձեն:

Ըստ գործակալության` խոսակցության ավարտից մոտ կես րոպե անց գործակալություն են զանգել ինչ-որ համարից, լսել լրագրողի ձայնն ու անջատել: Երբ գործակալության աշխատակիցներն այդ համարով հետ են զանգել, պատասխանել է մի կին, որը չի կարողացել խոսել վրացերեն: Նա հեռախոսը փոխանցել է մեկ այլ կնոջ, որը խնդրել է խոսել ռուսերեն, սակայն երբ լրագրողը փորձել է պարզել նրանց ինքնությունը, հեռախոսն անջատել է եւ այլեւս չի պատասխանել զանգերին: