Ռուսաստանը հավանություն չի տալու Սիրիայի դեմ բանաձեւին

Ռուսաստանը հավանություն չի տալու ՄԱԿ-ի Անվտանգության խորհրդի` Սիրիայի դեմ բանաձեւին, ինչպիսին ընդունվեց Լիբիայի դեպքում. այսօր «Սկոլկովո» գիտատեխնիկական կենտրոնում տեղի ունեցած ասուլիսի ժամանակ հայտարարել է ՌԴ նախագահ Դմիտրի Մեդվեդեւը:

«Ես հավանություն չեմ տա նման բանաձեւին, եթե նույնիսկ այդ խնդրանքով ինձ դիմեն ընկերներս ու մտերիմներս»,- ասել է նախագահը:

Ինչ վերաբերում է Լիբիայի վերաբերյալ ՄԱԿ-ի ԱԽ 1970, 1973 բանաձեւերին, ապա, ըստ Մեդվեդեւի, դրանք կոպտորեն ոտնահարվել են մի շարք պետությունների իրականացրած գործողություններով: Ըստ նրա` թեեւ Ռուսաստանն ի սկզբանե հավանություն էր տվել բանաձեւերից մեկին, իսկ մյուսին վետո չէր դրել, իրադարձությունների հետագա զարգացումները ցույց տվեցին, որ «նման բանաձեւերով կարելի է մանիպուլյացիաներ անել, ինչը հարված է հասցնում ՄԱԿ-ի հեղինակությանը»:

ՌԴ նախագահը համոզված է, որ պետություններին հարկավոր է հնարավորություն տալ ինքնուրույն ընտրելու սեփական զարգացման ուղին: