Ամերիկյան վետո` Իսրայելի դեմ ուղղված բանաձեւին

ՄԱԿ-ում ԱՄՆ դեսպան Սյուզան Ռայսը երեկ հայտարարել է, որ Միացյալ Նահանգները վետո է դնում Անվտանգության խորհրդի բանաձեւի վրա, որը դատապարտում է Հորդանանի արեւմտյան ափին Իսրայելի կողմից բնակավայրերի կառուցումը: ՄԱԿ-ի ԱԽ մյուս 14 անդամները հավանություն են տվել այդ փաստաթղթին:

Ռայսի խոսքերով` Օբամայի վարչակազմին հուզել է մեկ հարց` արդյո՞ք բանաձեւի ընդունումը կհանգեցնի խաղաղ բանակցությունների վերսկսմանը: «Մենք վճռականորեն հերքում ենք Իսրայելի գործողությունների օրինականությունը: Սակայն, ցավոք, բանաձեւի նախագիծը երկու կողմերի դիրքորոշումների կոշտացման ռիսկ է ստեղծում»,- ասել է նա:

Պաղեստինյան ինքնավարության ղեկավար Մահմուդ Աբասը հայտարարել է, որ ԱՄՆ վետոն չի նպաստի խաղաղ բանակցությունների վերսկսմանը եւ կբարդացնի իրավիճակը Մերձավոր Արեւելքում:

Իսկ Իսրայելի ԱԳՆ-ն հայտարարել է, որ պաղեստինցիների հետ ուղիղ բանակցությունները հակամարտության լուծման միակ ճանապարհն են:

Իսրայելա-պաղեստինյան խաղաղ բանակցություններն ընդհատվել են սեպտեմբերին` Հորդանանի արեւմտյան ափին իսրայելական բնակավայրերի շինարարության սառեցման 10-ամսյա ժամկետը լրանալուց հետո: Պաղեստինցիները հայտարարում են, որ չեն նստի բանակցությունների սեղանի շուրջ, քանի դեռ Իսրայելը չի դադարեցրել շինարարությունը, իսկ Իսրայելը համարում է, որ բանակցությունները կարելի է շարունակել` այդ հարցը շրջանցելով: