Հայաստանի արտգործնախարարը Փարիզում է

Աշխատանքային այցով Փարիզում գտնվող արտգործնախարար Էդվարդ Նալբանդյանը հանդիպել է Ֆրանսիայի իր գործընկերոջը՝ ԱԳ նախարար Ալեն Ժյուպեի հետ: Երկուստեք գոհունակությամբ նշվել են բարձր մակարդակի փոխայցելությունների եւ քաղաքական երկխոսությունը, իրավապայմանագրային լայն հենքը, միջխորհրդարանական ամուր կապերը, ապակենտրոնացված ինտենսիվ համագործակցությունը, Հայաստանում ֆրանսիական ընկերությունների աճող ներկայությունը:

Հայաստանի եւ Ֆրանսիայի արտաքին քաղաքական գերատեսչությունների ղեկավարները անդրադարձել են երկկողմ հարաբերությունների զարգացման նպատակով ձեռնարկվելիք քայլերին, միջազգային եւ տարածաշրջանային երկուստեք հետաքրքրություն ներկայացնող խնդիրների: Նախարարներն արձանագրել են, որ մի շարք միջազգային հարցերի վերաբերյալ Հայաստանի եւ Ֆրանսիայի դիրքորոշումները համընկնում են:

Նրանք քննարկել են Հայաստան-Եվրոպական Միություն հարաբերությունները եւ այդ շրջանակներում իրականացվող ծրագրերը, մտքեր փոխանակել միջազգային կազմակերպությունների շրջանակներում հայ-ֆրանսիական համագործակցության շուրջ, անդրադարձել Ֆրանկոֆոնիայի միջազգային կազմակերպության գործունեությանը:

Բանակցությունների օրակարգում է եղել Արցախյան հիմնախնդրի կարգավորման գործընթացը: Երկուստեք շեշտվել է, որ հիմնահարցի խաղաղ եւ բանակցային լուծումն այլընտրանք չունի:

Մայիսի 17-ին Էդվարդ Նալբանդյանը հանդիպում  է ունեցել նաեւ Ֆրանսիայի նախագահի դիվանագիտական եւ արտաքին քաղաքականության հարցերով խորհրդական Ժան-Դավիդ Լեւիտի հետ: Հանդիպման ընթացքում քննարկվել են այս տարվա երկրորդ կեսին Ֆրանսիայի նախագահ Նիկոլա Սարկոզիի՝ Հայաստան այցելության, ինչպես նաեւ ՀՀ նախագահ Սերժ Սարգսյանի՝ Ֆրանսիա կատարելիք այցի նախապատրաստմանն առնչվող հարցեր:

Այսօր Էդվարդ Նալբանդյանը հանդիպելու է Ֆրանսիայի Սենատի եւ Ազգային ժողովի անդամների հետ: