Գլենդեյլում հայեր են ձերբակալվել

Էլեկտրականության եւ գազի հաշվիչների տվյալները ավելի քան 10 հազար դոլարի չափով կեղծելու մեղադրանքով Լոս Անջելեսի ոստիկանությունը երեքշաբթի օրը ձերբակալել է Բորիս Նազարյանին եւ Գագիկ Ասլանյանին:

Գլենդեյլի Water & Power ընկերությունը արձանագրել է, որ երկու տներում կասկածելիորեն կրճատվել է էլեկտրաէներգիայի եւ ջրի օգտագործումը: Ստուգումներ են անցկացվել, եւ հայտնաբերվել է, որ Բորիս Նազարյանը փոխել է հաշվիչի տվյալները, որի արդյունքում ավելի քան 3 հազար 300 դոլար է գողացել, իսկ Գագիկ Ասլանյանը`  6 հազար 900 դոլար:

Ոստիկանությունը հաշվիչները առգրավել է եւ ուղարկել դատափորձագիտական քննության: Ի դեպ, նման գողության համար 4 հազար 700 դոլարի տուգանք է նախատեսված:

Ըստ Գլենդեյլի Water & Power ընկերության մամուլի խոսնակ Աթինե Հարությունյանի` մոտ 150 բաժանորդ վերջին երկու տարիների ընթացքում կեղծիքներ են կատարել: Գողացված գումարներից 42 հազար դոլարը վերականգնվել է: