Ավելի քան 2700 կրակոց մեկ շաբաթվա ընթացքում

Ի տարբերություն ընթացիկ տարվա նախորդ շաբաթների, անցած յոթնօրյակում ղարաբաղա-ադրբեջանական հակամարտ զորքերի շփման գծում արձանագրվել է հրադադարի ռեժիմի խախտման շեշտակի աճ:

Համաձայն ՊԲ օպերատիվ տվյալների` շաբաթվա ընթացքում հակառակորդը տարբեր տրամաչափի հրաձգային զենքերից սահմանահատվածի ողջ երկարությամբ հրադադարի պահպանման ռեժիմը խախտել է շուրջ 350 անգամ` արձակելով ավելի քան 2700 կրակոց:

Առավել ինտենսիվ կրակահերթեր են արձանագրվել ապրիլի 27-29-ը ընկած ժամանակահատվածում: Ադրբեջանական բանակի առաջապահ ուժերը   АК, СВД,  «Սև նետ», ПК,  ДШК, УТЕС տիպի զինատեսակներից շփման գծի հարավարևելյան, արևելյան, հյուսիսարևելյան և հյուսիսային ուղղություններում տեղակայված հայկական դիրքերի վրա միայն երեք օրվա ընթացքում արձակել են շուրջ 1800 կրակոց:

Հրադադարի խախտման արդյունքում, դժբախտաբար, ղարաբաղյան կողմն ունեցել է կորուստներ:

ՊԲ առաջապահ ստորաբաժանումների կողմից ձեռնարկված համարժեք գործողություններից հետո շփման գծի ողջ երկարությամբ հակառակորդի ակտիվությունը ճնշվել է. նշված է  ՊԲ լրատվության և քարոզչության բաժնի հաղորդագրության մեջ: