Բարեփոխում կրթական համակարգում

Այս տարի առաջին անգամ կյանքի կկոչվի ընդունելության քննությունների միասնականությանը վերաբերող` ԿԳՆ նախատեսած բարեփոխումը. այս մասին «Ուսուցման բազմաձեւության արդիականությունը եւ հեռանկարները Բոլոնիայի գործընթացի համատեքստում» խորագրով միջբուհական գիտագործնական կոնֆերանսի ժամանակ տեղեկացրեց կրթության եւ գիտության նախարար Արմեն Աշոտյանը:

Նա նշեց, որ այս տարվանից, անկախ կազմակերպաիրավական եւ սեփականության ձեւից, պետական եւ ոչ պետական բուհերն առկա ուսուցման համակարգում ընդունելություն կկազմակերպեն միայն կենտրոնացված կարգով:

«Սա, իհարկե, մարտահրավեր է ե'ւ պետական, ե'ւ, հատկապես, մասնավոր բուհերի համար, եւ այս մարտահրավերը դիմագրավելու նպատակով մասնավոր բուհերը պետք է մշակեն այնպիսի քաղաքականություն, որով կկարողանան գոյատեւել, աշխատել եւ զարգանալ»,- ասաց նախարարը: