Դժգոհ է, որ "Հայոց աշխարհի" դեմ հայցը չի բավարարվել

Վերջին շրջանում հայկական լրատվամիջոցները դարձել են օլիգարխների, քաղաքական գործիչների թիրախը, կարելի ասել նաեւ` հեշտ վաստակի աղբյուր, չնայած պատիվ ու հարգանք պահանջողները մամուլի խեղճ միջոցներից կորզած գումարներով չէ, որ հարստանում են: Մի շարք հայկական թերթերի դեմ դատական հայցերի վերաբերյալ կարծիք իմանալու ակնկալիքով դիմեցինք Հայաստանի ժուռնալիստների միության նախագահ Աստղիկ Գեւորգյանին:

- Տիկի'ն Գեւորգյան, վերջին շրջանում մի շարք լրատվամիջոցների նկատմամբ դատական գործընթացներ են սկսվել: Դուք, որպես Հայաստանի ժուռնալիստների միության նախագահ, ի՞նչ կարծիք ունեք լրատվամիջոցների եւ լրագրողների վրա այս աննախադեպ հարձակման վերաբերյալ:

- Լրագրողը յուրաքանչյուր վերնագրի, ստորագրության եւ հարցի համար պետք է պատասխանատվություն կրի, այլապես մենք չենք կարող ձերբազատվել այդ դատական պրոցեսներից:

- Իսկ միությունը, այնուամենայնիվ, կքննարկի՞ այս հարցը:

- Եթե նման հարց լինի, ես ձեզ կպատասխանեմ: Մոտ երկու շաբաթ առաջ մեծ լսարանում ես խոսել եմ այս մասին: Այո, ես չեմ բավարարում ոչ մի լրատվամիջոցի, ովքեր ստեղծագործական միությունների, օլիգարխների բարի համբավը վարկաբեկել են, նրանք էլ դիմել են դատարան: Օլիգարխների հայցերը դատարանը բավարարել է, իսկ ստեղծագործական միության հայտը չբավարարվեց ընդդեմ «Հայոց աշխարհ» թերթի: Բայց այստեղ «Հայոց աշխարհ» թերթն է մեղավոր, ես ինչպե՞ս պաշտպանեմ «Հայոց աշխարհ»-ին: Թերթը գրել է ստեղծագործական միության նախագահի մասին, որ գող է, վաճառել են եւ այլն, եւ այլն:

Ճիշտ են արել, որ դատի են տվել, ուրեմն լրագրողը, այս դեպքում` Կիմա Եղիազարյանը պատասխանատվության զգացում պետք է ունենա: Մինչեւ սպիտակ թուղթ մրոտելը նա պետք է հասկանա, որ մարդու պատվի եւ արժանապատվության հետ է խաղում: Մեր գործն է պաշտպանել ամեն ինչով, բայց ո՞նց պաշտպանենք: Մենք գնում ենք անկախության 20-ամյակին եւ փոխանակ ուենանք որակյալ եւ պատասխանատու լրատվամիջոցներ, ունենում ենք անպատասխանատու լրատվամիջոցներ: Հենց սա է վատը:

- Բայց խոսքը միայն մեկ թերթի չի վերաբերում: Դատարանի առաջ են հայտնվել ե'ւ լրատվամիջոցներ, ե'ւ լրագրողներ: Համատարած արշավ է սկսվել այս ուղղությամբ:

- Ընդդիմադիր մամուլին թվում է, թե ինչքան պիտակներ փակցնի, այնքան ինքը ընդդիմադիր կլինի, դա չէ ընդդիմադիրը: Ընդդիմադիր մամուլն այնպես պետք է լինի, որ օգնի պետությանը, որ ասի` չեք տեսնում այս բանը, եւ մենք որպես չորրորդ իշխանությունը ձեզ ցույց ենք տալիս: Իսկ ընդդիմադիր մամուլը պատվերը որտեղից որ ստանում է, այնպես էլ գործում է, կամ էլ` դրսի դրամաշնորհ կազմակերպությունների թելադրանքով: Մի անգամ չեմ տեսել, որ քննադատական հոդված գրեն կամ նորմալ հետքերով գրեն ու մեկին չազատեն աշխատանքից:

- Իսկ դուք ունե՞ք տվյալներ, թե քանի լրատվամիջոց է նմանատիպ մեթոդներով աշխատում:

- Ոչ չունեմ: Մարդիկ խոսքի ազատությունը հասկանում են որպես ամենաթողություն, ով ինչ ուզում է, գրում է: Լրագրողը պետք է ունենա պատասխանատվության զգացում, այլ ոչ թե պատվեր ընդունի եւ վարկաբեկի ազնիվ մարդկանց: