ԱՌԱՎՈՏ. Հոգաբարձուները կասեն իրենց խոսքը

Մարտի 30-ին «Հիմնադրամն ընդդեմ նախարարության» հրապարակմամբ «Առավոտն» անդրադարձել է «Մեկ ազգ, մեկ մշակույթ» հիմնադրամի տնօրեն, ՀՀ մշակույթի նախկին նախարար Թամարա Պողոսյանի բողոք-դժգոհությանը հիմնադրամի հոգաբարձուների խորհրդի նախագահ, ՀՀ Սփյուռքի նախարար Հրանուշ Հակոբյանից: Տիկին Պողոսյանը պնդում էր, որ տիկին Հակոբյանը  խախտել է մի շարք օրենքներ եւ իրավական ակտեր:

Այն ժամանակ Հրանուշ Հակոբյանը Հայաստանում չէր, եւ նրա պատասխան խոսքը լսելու հնարավորություն չկար: Տիկին Հակոբյան արդեն Երեւանում է:  Թամարա Պողոսյանի մեղադրանքների վերաբերյալ պարզաբանումներ տալու մեր առաջարկին ի պատասխան` ՀՀ Սփյուռքի նախարարությունից ասացին, որ «Մեկ ազգ մեկ մշակույթ» հիմնադրամի հոգաբարձուների խորհուրդը 2010 թվականի դեկտեմբերի 28-ի իր որոշումները կայացնելիս ղեկավարվել է բացառապես հիմնադրամի կանոնադրությամբ»:

Նախարարությունից ավելացրին նաեւ, որ «Մեկ ազգ մեկ մշակույթ» հիմնադրամի հոգաբարձուների խորհուրդը մոտ ժամանակներս նիստ է հրավիրելու, ուր կքննարկվեն ոչ միայն ապագա քայլերը: