Լիբիացի կանայք պատրաստ են մեռնել հանուն Քադաֆիի

Մոտ 500 կանայք եւ աղջիկներ երդվել են հավերժ սիրել Մուամար Քադաֆիին եւ մեռնել նրա համար. տեղեկացնում է The Guardian-ի թղթակիցը, որն, ի թիվս 50 այլ լրատվամիջոցների ներկայացուցիչների, ներկա է եղել Լիբիայի առաջնորդին զենքով պաշտպանել պատրաստվող կանանց հավաքին:

«Սպանեք բոլոր լիբիացիներին, հետո եկեք Մուամար Քադաֆիի հետեւից,- հայտարարել է 14-ամյա մի աղջնակ:- Ես կսպանեմ ինձ, եթե Մուամար Քադաֆիին սպանեն»:

Դահլիճում եղել են տարբեր տարիքի կանայք` Լիբիայի կանաչ դրոշներով, Քադաֆիի նկարներով: Դրսում հնչել են կրակոցներ. ռազմական դասընթացներ ավարտած թույլ սեռի ներկայացուցիչները համազարկեր են տվել նոր ստացած զենքերից:

Լրագրողները չեն կարողացել հասկանալ` այդ ամենը հատուկ իրենց համա՞ր է արվում, թե՞ ինքնաբուխ է, սրտից եկող:

Լիբիայի կառավարության մամուլի քարտուղար Մուսա Իբրահիմը հայտարարել է. «Լիբիացի կանայք միացել են ՆԱՏՕ-ին դիմակայող մեր զինված ուժերին: Նրանց հիմնական դերն իրենց տները պաշտպանելն է: Նրանց ճակատ ուղարկելու հատուկ ծրագրեր չունենք: Կանայք դեռ նման պատրաստություն չեն անել, բացի այդ` մեր բանակը բավական արդյունավետ է գործում»: