Ադրբեջանցիների հետ էլ` "Նեմեսիսի" լեզվով

Ադրբեջանցիների հետ աղերսներով խոսելու ժամանակը վաղուց անցել է, պետք է անցնել հակահարձակման: Այսօր լրագրողների հետ հանդիպման ժամանակ ասաց Ադրբեջանահայերի ասամբլեայի նախագահ Գրիգորի Այվազյանը:

«Մենք պետք է նախաձեռնողական քաղաքականություն վարենք: Հայերին կոտորողներից ոմանք արդեն կանգնած են Ալլահի դատաստանի առջեւ, իսկ ողջ մնացածները պետք է ցուցադրաբար պատժվեն` «Նեմեսիս» օպերացիայի օրինակով»,- ասաց Ադրբեջանահայերի ասամբլեայի նախագահը:

Նա նշեց, որ ադրբեջանցիների դեմ պայքարում այլ ելք չկա, նույնիսկ անօգուտ է միջազգային դատարաններ դիմելը:

Կոնկրետ քայլ է նաեւ այն, որ Գ. Այվազյանն իր թեկնածությունն էր առաջադրել Ադրբեջանի մեջլիսի ընտրությունների ժամանակ. «Ադրբեջանը կասկածի տակ էր դնում ԼՂՀ ընտրությունների լեգիտիմությունն այն հիմնավորմամբ, թե դրանց չի մասնակցում ադրբեջանական համայնքը»:

Այս քայլով Գ. Այվազյանը փորձել է ցույց տալ, որ 1990 թվականից մինչ օրս Ադրբեջանի ընտրություններն էլ ճեն կարող լեգիտիմ համարվել, քանի դրանց չի մասնակցել հայկական համայնքը, մարդիկ, ովքեր փախստական դարձան բռնի տեղահանությունների պատճառով:

«Ադրբեջանի իշխանությունները Կենտրոնական ընտրական հանձնաժողովի նախագահի միջոցով ճանաչել են իմ` ընտրություններին մասնակցելու իրավունքը, հետո հետ են  կանգնել այդ որոշումից` չտալով անվտանգության  որեւէ երաշխիք, գրավոր կերպով պատասխան չտալով: Այդ պատճառով մեր մասնակցությունը տապալվեց»,- ասաց Գ. Այվազյանը:

Նա նշեց նաեւ, որ հավանական է` իր թեկնածությունը առաջադրի նաեւ Ադրբեջանի նախագահական ընտրություններին. «Պատրաստ եմ առաջադրել իմ թեկնածությունը, միայն թե ապացուցեմ, որ ադրբեջանցի թուրքերը եւ հայերը մեկ պետության սահմաններում չեն կարող խաղաղ գոյատեւել: Եթե հակառակն է, ապա թող ցույց տան գոնե մեկ զտարյուն հայի մեջլիսում եւ կառավարությունում»:

Ասամբլեան քայլեր է ձեռնարկում նաեւ այն ուղղությամբ, որ եթե քննարկվում է ադրբեջանցի «փաստականների վերադարձը» Արցախ, ապա պետք է քննարկվի նաեւ հայ փախստականների` Բաքու, Սումգայիթ եւ մյուս բնակավայրեր վերադարձի հարցը: